Ghazal

"dard-e-dil ne nai kasak paai aap ki yaad jab kabhi aai kaun jaane jo dil pe guzri hai kis ne naapi hai gham ki gahraai ab junun kaa khudaa hi haafiz hai vahshat-e-dil ne li hai angDaai aashiyaane ki khair ho yaa-rab phir ghaTaaon mein barq lahraai ashk phir aaj ho gae arzaan chhaT gayaa daaman-e-shakebaai karte rahte hain jo ghalat tanqid vo samajhte hain us ko daanaai 'raahi' paa kar suraagh manzil kaa azm mein aa gai tavaanaai"

"meraa ho kar bhi mujh se barham hai dil kaa aalam ajiib aalam hai aap ne zulm ataa kiye mujh ko aap kaa ye karam bhi kyaa kam hai dil pe jis din se saaya-e-gham hai dhaDkanon ki sadaa bhi maddham hai jin mein aansu kabhi na aae the aaj vo aankh bhi to pur-nam hai har taraf hai ghamon kaa sannaaTaa har taraf zindagi kaa maatam hai zindagi ki masarratein qurbaan kitnaa pur-lutf dard-e-paiham hai teraa 'raahi' hai muntazir aa jaa kis qadar khush-gavaar mausam hai"

"zehn-o-dil ko judaa judaa rakhnaa mujh se itnaa to silsila rakhnaa qurbaton ki agar ho khvaahish phir tum ko laazim hai faasla rakhnaa gar ye chaaho bharam rahe qaaem apne paivand ko chhupaa rakhnaa laakh gham kaa dhuaan rahe dil mein apnaa chehra khilaa khilaa rakhnaa toD Daale hain jis ne sab rishte ab taalluq bhi us se kyaa rakhnaa sab khushi doston mein mat baanTo dushmanon ke liye bachaa rakhnaa ik na ik din vo aaegaa 'raahi' apnaa darvaaza tum khulaa rakhnaa"

"nafrat qubul jo mile thoDaa saa pyaar bhi pahlu mein gul ke shaakh pe hote hain khaar bhi sab par huaa ayaan miraa haal-e-shikast-e-dil jab tak the ashk aankhon mein the raazdaar bhi aa jaa ki hai fasurda har ik gul tire baghair hai kis qadar udaas ye fasl-e-bahaar bhi ummid khatm taar-e-nafas TuTne lagaa kab saath chhoD de ye tiraa intizaar bhi vahshat ne noch Daalaa mire jism kaa libaas baaqi rahe kahaan vo garebaan ke taar bhi hoti nahin qubul miri koi bhi duaa shaayad ki hai khafaa miraa parvardigaar bhi 'raahi' milegi manzil-e-maqsud kyaa khabar hai qaafile ki raah mein gard-o-ghubaar bhi"

"jab apni aankhon se ashkon kaa qaafila niklaa kinaare TuuTe to dariyaa kaa hausla niklaa vo meri bazm mein aae raqib ke hamraah chalo ki milne kaa koi to silsila niklaa milein na aaj bhi bachchon ko roTiyaan shaayad vo ghar se subh yahi sochtaa huaa niklaa vo ik varaq ki miraa naam jis pe likkhaa thaa tiri kitaab mein vo kyon miTaa miTaa niklaa main apne chehre pe khushiyaan sajaa to laayaa magar har ek shakhs mire gham se aashnaa niklaa main apnaa haal sunaane lagaa jise 'raahi' to us kaa dard mire dard se sivaa niklaa"

"tum mire saamne aao to koi baat bane zakhm is dil pe lagaao to koi baat bane aag ghar ki to zamaane mein bujhaate hain sabhi aatish-e-dil jo bujhaao to koi baat bane raah-e-hasti mein kaDi dhuup hai mere sar par tum ghaTaa ban ke jo chhaao to koi baat bane chaDhte suraj ko to har shakhs hi kartaa hai salaam girte logon ko uThaao to koi baat bane har musaafir ko jahaan phal bhi mile saaya bhi peD kuchh aise lagaao to koi baat bane ghar ke aangan ki to divaar giraa di 'raahi' dil kaa minaar giraao to koi baat bane"

"kisi ke gham ko gale se lagaae baiThe hain ham apne saare ghamon ko bhulaae baiThe hain sukun-e-dil ke liye aaj tere divaane tire khayaal ki duniyaa sajaae baiThe hain syaah raat hai vo aaein to ujaalaa rahe isi ummid pe shamein jalaae baiThe hain kahaan se laaein vo tinke chunein to kis ke liye jo khud hi apnaa nasheman jalaae baiThe hain ab un ki samt bhi ho jaae kaash nazar-e-karam jo log der se mahfil mein aae baiThe hain karein to kis pe karein eatibaar ai 'raahi' har ek dost ko ham aazmaae baiThe hain"