Ghazal

"aisaa naghma mire sitaar mein hai jis ko dekho vahi hisaar mein hai aaine par hai dhuul maazi ki meraa chehra abhi ghubaar mein hai ik laraztaa badan thakaa haaraa aakhiri bus ke intizaar mein hai Dhal gaiin nafratein fazaaon ki dil mohabbat ke aabshaar mein hai peD taalaab aur hare manzar kitni maasumiyat dayaar mein hai"

"vo hai mere kahne mein namak milaa hai rishte mein gham aur khushiyaan rahti hain chhoTe se ik kamre mein khoyaa huaa meraa eazaaz mil saktaa hai malbe mein vo hai miThi miThi dhun shor bahut hai naghme mein nafrat mein jo lazzat hai baat kahaan samjhaute mein mausam jab tak Thiik na ho vo rahtaa hai sajde mein chhuTnaa mushkil hai 'jaaved' daagh bahut hain kapDe mein"

"gae vaqton se kuchh yaari bhi hogi hamaari naaz-bardaari bhi hogi zaraa si barf pighli hai abhi to mohabbat ki nadi jaari bhi hogi sulagte din baDe chaalaak honge magar bachchon mein hushyaari bhi hogi vo meri zaat se munkir na hogaa namak mein kuchh vafaadaari bhi hogi kaho 'jaaved' is maahaul mein kyaa usulon ki taraf-daari bhi hogi"

"phalon ne kho diyaa jis din se zaaiqa apnaa kisi ne peD se rakkhaa na raabta apnaa sulagti dhuup miraa imtihaan kyaa legi janaab-e-'mir' se miltaa hai silsila apnaa hamaare lafzon ne bakhshi kitaab ko azmat varaq to saare tumhaare the haashiya apnaa na jaane kaun si aafat idhar se guzregi parind chhoD ke jaate hain ghonsla apnaa na baiThne kaa saliqa na guftugu kaa shuur ajiib logon se paDtaa hai saabiqa apnaa miraa makaan khanDar ho gayaa hai ai 'jaaved' na jaane kab vo sunaaegaa faisla apnaa"

"andhe gunge bahre log ujle kapDe maile log kam-umri mein sunet hain mar jaate hain achchhe log bhaag rahe hain duniyaa mein paanv ko sar pe rakkhe log raste mein mil jaate hain titli ke par jaise log aainon ko le kar saath phirte hain be-chehre log mahnge ghar mein rahte hain barf ke jaise ThanDe log daur-e-haazir mein 'jaaved' kapDon mein hain nange log"

"is shajar par ek bhi pattaa nahin hijr kaa mausam abhi guzraa nahin likh diyaa hai dhuup ne sab kuchh magar vo mire chehre ko kyon paDhtaa nahin meri ghazlon se bhi phuTi hai kiran main sitaara ban ke kyon chamkaa nahin mere ghar tak aa gai pakki saDak dhuul se kapDon ko ab khatra nahin vaise interview to de aaya huun main kaamyaabi ke liye paisaa nahin"

"kab se hain mahrum ye shaakhein patton se aangan mein do peD hain sukhe barson se album se tasvir kaa rishta khatm karo khud ko dhokaa doge kab tak chehron se sun kar darvaaze se vo meri baatein lauT gayaa hai shaayad dhime qadmon se meri aankh savere hi khul jaati hai peD pe shor machaati hui gaurayyon se divaaron ke aaD mein rakhnaa Thiik nahin jal jaate hain ghar 'jaaved' charaaghon se"

"nanhe paudon ko ab shajar kar de mere ashaar mo'atabar kar de us kaa ghussa sharir bachchon saa ghar ki chizein idhar-udhar kar de konplein aa rahi hain shaakhon par zard patton ko dar-ba-dar kar de sar pe us ke ho baadalon ki ridaa dhuup ki shiddatein idhar kar de hain balaaein hazaar raste mein tark 'jaaved' ye safar kar de"

"na ghar nasib ho koi na saaebaan rahe yahi bahut hai mire sar pe aasmaan rahe mire buzurgon kaa ye shauq bhi niraalaa thaa haveliyon se juDi koi daastaan rahe mire baDon pe gumaan ho tire charaaghon kaa havaa kaa zor rahe aur miri uDaan rahe miri gali ke shivaale mein kirtan bhi ho tire paDos ki masjid mein bhi azaan rahe siyaah raah mein 'jaaved' baanTtaa huun charaagh ki raushni se na khaali koi makaan rahe"

"dilon ki tahrir aansuon se miTaa chuke hain hamaare paanv safar ki lazzat ganvaa chuke hain jadid lahje kaa ek shaair ghazal-saraa hai diye puraane mazaar ke ham bujhaa chuke hain khanDar kaa malba zamin pe kab kaa bikhar chukaa hai amir-zaade shanaakht apni miTaa chuke hain puraane album kaa har varaq hai siyaah ab to kisi kaa chehra ham apne dil se haTaa chuke hain kisi ke mansab kisi ki daulat kaa zikr mat kar qasida-khvaani ki buDhi rasmein uThaa chuke hain"

"chubh rahe hain aap ke jumle bahut phuul shaakhon par hain kam kaanTe bahut dhuup niklegi agar baarish ke baad rang divaaron se utreinge bahut guftugu kaa lutf aaegaa use talkh ho jaaeinge jab lahje bahut ujle kapDe the sabhi ke jism par mez ki chaadar pe the dhabbe bahut kis tarah se ham karein koi gunaah har jagah mil jaate hain apne bahut zikr us kaa mat karo 'jaaved' se ek dil hai aur hain sadme bahut"

"pichhli sadi ke buDhe peD lambe chauDe unche peD jin ki shaakh pe jhule ham kitne kushaada the ve peD baagh lagaa kar dekh zaraa aaDe tirchhe sidhe peD is tufaani baarish mein jaD se ukhDe kitne peD Daar se bichhDe patton par ranj kareinge buDhe peD gaanv kaa mausam kaisaa hai kyaa gaate hain naghme peD qismat mein sahraai ki nanhe munne chhoTe peD sabz-ruton mein hote hain piile ujDe sukhe peD ham bhi ghar ko lauT aae aandhi se jab sahme peD"

"kyaa huaa haasil tumhein sach bol ke kuchh parinde uD gae par tol ke raushni hi raushni hai har taraf rakh diyaa kis ne sahifa khol ke aane vaale daur ki aabaadiyaan bhiik maangeingi bilaa kashkol ke ham khudaa ki raah se bhaTke agar mustahiq ban jaaeinge laa-haul ke log the showcase mein mahnge bahut bik gae 'jaaved' ham bin mol ke"

"kund talvaar se taaqat nahin milne vaali buzdili se kabhi himmat nahin milne vaali qad baDhaae hue kuchh zehn ke baune nikle is numaaish se to qaamat nahin milne vaali taalib-e-ilm huun urdu kaa khataa meri hai naukri ab kisi surat nahin milne vaali in fasaadaat ko mazhab se alag bhi rakkho qatl hone se shahaadat nahin milne vaali saste sheron ko tarannum se sunaao 'jaaved' varna aasaani se shohrat nahin milne vaali"

"giraa ke sahn ki divaar raasta kar dein uTho ki khatm ye ranjish kaa silsila kar dein guzar chuki hai jo aandhi use na yaad rakhein dilon ko saaf karein aur aaina kar dein badal dein saari haqiqat ko ik fasaane mein aur apni bhuul se mansub vaaqia kar dein nae charaaghon pe rakkhein nazar puraane diye ye phir se aag lagaa kar na haadisa kar dein ta'alluqaat ko 'jaaved' lag na jaae nazar ki milne-julne mein thoDaa saa faasla kar dein"

"sab apni qabr mein murda paDe hain dar-o-divaar par katbe jaDe hain dhuaan phailaa huaa hai raaston par ham apni saans ko roke khaDe hain ujaalon ko nazar mein qaid kar lo diye tahzib ke bujhne lage hain gharon mein amn kaa maahaul rakhnaa ki bachche kachchi miTTi ke ghaDe hain nazar aate nahin 'jaaved' chehre yahaan to qad se aaine baDe hain"

"use dekhaa use sochaa bahut hai mohabbat ke liye itnaa bahut hai raunat aa gai lahje mein us ke sunaa hai aaj-kal paisaa bahut hai main huun aurangzeb apni sadi kaa mujhe taarikh se shikva bahut hai bano tum shauq se aaina lekin hamaare paas bhi chehra bahut hai kabhi 'jaaved' par mat tanz karnaa kharaa shaair hai aur sachchaa bahut hai"

"vo har jumla adhuraa boltaa hai phir us ke baa'd chehra boltaa hai vo taht-ul-lafz ho yaa ho tarannum ghazal kis ki hai lahja boltaa hai hai aurat ik saliqe-mand ghar mein sajaavaT kaa tariqa boltaa hai jahannum naam likhvaa legaa apne buzurgon se jo unchaa boltaa hai ghazal 'jaaved' ne chheDi hai jab se jidhar dekho ujaalaa boltaa hai"

"ek jugnu hai meri muTThi mein shor barpaa hai saari basti mein jal gae phir se kuchh hasin rishte tanziya guftugu ki bhaTTi mein dil ki taarikiyaan huiin raushan koi zinda hai meri hasti mein jo gunaahon mein gharq rahte the aaj gum hain khudaa-parasti mein dhime dhime pataa chalaa 'jaaved' an-ginat khubiyaan hain dilli mein"

"aag hi aag aasmaan lagaa dhuup ki tarah saaebaan lagaa qahqahe ug rahe the shaakhon par baagh jaisaa vo khaandaan lagaa kitni unchi hain us ki mehraabein vo bhi maazi kaa ik makaan lagaa kitni qiston mein ab paDhun us ko vo mujhe ek daastaan lagaa tark kar lungaa us se har rishta vo agar mujh ko imtihaan lagaa"

"sitaara ban kar chamak rahaa hai vo kis qabile kaa devtaa hai zamin pe patte bikhar rahe hain khizaan kaa mausam bahut buraa hai ajab andheron mein kho gayaa huun pataa nahin dil kahaan bujhaa hai puraane chehron se aaj bhi to tumhaaraa album sajaa huaa hai nae charaaghon ke saath sab hain bujhe diyon kaa faqat khudaa hai"

"chehra hai aaina hai kamre mein sannaaTaa hai phulon ki khushbu paa kar dil paagal ho jaataa hai shaah-e-vaqt ko Dar kaisaa saamne ek piyaada hai us ki anaa mahfuz rahe mujh par tanz jo kartaa hai dekhun saath rahe kab tak shaakh huun main vo pattaa hai aankhein us ki hansti hain mujh se koi rishta hai bhiiD se niklo vo 'jaaved' tanhaai mein miltaa hai"

"yaadon ke album ko le kar aate hain chaand se chehre khvaab mein aksar aate hain baap ki maar bahan ki jhiDki maan ki DaanT raat gae kyaa lene ham ghar aate hain paisa kamaa kar rakhnaa kitnaa mushkil hai ghar ke masaail bhes badal kar aate hain ho saktaa hai koi musibat aai ho ab us ke paighaam baraabar aate hain"

"azmaton mein hai saadgi us ki paDh ke dekhi jo zindagi us ki soch kar tanz kijiye saahib har diye mein hai raushni us ki ujlatein hain safar pe aamaada baandh leti hai dilkashi us ki dab gayaa hai vo apni ghurbat mein shakhsiyat hai pahaaD si us ki sher kaaghaz pe phir nahin utre munh chiDaati rahi ghaDi us ki"