Ghazal

"vo har qadam mire hamraah rahguzar mein rahe miraa hi zauq-e-safar mere ham-safar mein rahe diyaa gayaa hai unhin ko bahaaduri kaa nishaan ba-vaqt-e-jang jo chup-chaap apne ghar mein rahe tumhaare pyaar kaa main bhi huun mo'tarif ai dost tumhaaraa dard bhi kuchh mere dard-e-sar mein rahe unhein to kuchh na milaa jo khaDe the saahil par jo tah mein utre vahi halqa-e-guhar mein rahe khudaa kare ki dam-e-subh jab bhi aankh khule tumhaaraa phuul saa chehra miri nazar mein rahe ye baat sach hai ki aksar gharib ke bachche amiir bachchon se achchhe class-bhar mein rahe isi se hoti hai paidaa kalaam mein taasir qalam uThaao to maahaul bhi nazar mein rahe yahi hai aarzu 'naazir' ki shaa'iri ke tufail hamaari 'izzat-o-takrim har bashar mein rahe"

"andheri shab ki abhi maat hone vaali hai yahaan pe nuur ki barsaat hone vaali hai samaa'aton mein 'ajab sansani si hoti hai na jaane kis se miri baat hone vaali hai zamaana tarsaa hai didaar ke liye jis ke usi se meri mulaaqaat hone vaali hai parinde apne baseron ki or jaane lage ye lag rahaa hai ki ab raat hone vaali hai abhi to kam hai magar khauf hai yahi naazir kuchh aur sakhti-e-haalaat hone vaali hai"

"ru-e-zebaa ke parastaar nahin ho sakte jo mohabbat mein giraftaar nahin ho sakte tu jo chaahe to hamein daar-o-rasan tak le chal ham magar itne gunahgaar nahin ho sakte khud-parasti ho rag-o-pai mein saraayat jin ke qaum-o-millat ke vo me'maar nahin ho sakte kuchh na kuchh un mein bhi khuddaari ke jazbe honge mere dushman pas-e-divaar nahin ho sakte muskuraate hue har zulm tiraa sah leinge ham magar desh ke ghaddaar nahin ho sakte ye alag baat tumhein chaah rahe hain phir bhi ham tiri shab ke kharidaar nahin ho sakte khud jo karte nahin aslaaf ki 'izzat 'naazir' vo kabhi saahib-e-kirdaar nahin ho sakte"

"jab mire shahr-e-mohabbat mein vo aa jaaegaa dil mein jazbon ki nai jot jagaa jaaegaa apne allaah pe har lamha bharosa rakkho gham kaa tufaan bahar-haal chalaa jaaegaa jis ne paighaam mohabbat kaa diyaa duniyaa ko saare 'aalam kaa vo mahbub kahaa jaaegaa har ghalat baat ki tashhir na ho paaegi sach bahar-haal sar-e-'aam kahaa jaaegaa chand lamhon ki mulaaqaat kaa manzar mat puchh kyaa khabar thi vo mire dil mein samaa jaaegaa hosh uD jaaegaa baDh jaaegi dil ki dhaDkan yak-ba-yak jab vo tire saamne aa jaaegaa tirgi-e-gham-e-dauraan se na ghabraa 'naazir' ye andheraa bhi bahut jald chalaa jaaegaa"

"ji bhar ke mujhe raat ko rone nahin dete sonaa bhi agar chaahun to sone nahin dete har vaqt nasihat kaa khulaa rahtaa hai daftar daaman ko gunaahon mein bhigone nahin dete ab shahr ke hangaamon se ghabraane lagaa huun khonaa bhi jo chaahun to ye khone nahin dete kahte hain ye hai lutf-e-sitamgar ki nishaani vo dil kaa mire daagh bhi dhone nahin dete rakh dete hain haathon ko baDe naaz se munh par jo baat hai honi ise hone nahin dete kyaa baat hai tum apni hasin saanson ki khushbu mujh ko dil-o-dida mein samone nahin dete 'naazir' miri shirini-e-guftaar mein kuchh log haalaat ki talkhi ko Dubone nahin dete"

"zindagi ke lutf se sarshaar honaa chaahiye aadmi ko aadmi se pyaar honaa chaahiye ye jununi kaifiyat dil se nikaalein apne log amn ke maahaul mein tyauhaar honaa chaahiye tum ko apne saath hi rakkheinge ham har haal mein haan vafaaon kaa magar iqraar honaa chaahiye duur rah kar bhi usi pahle ta'alluq ki tarah tere mere darmiyaan ik taar honaa chaahiye masalon ko hal karein mil baiTh kar ham tum magar faisla naa-qaabil-e-inkaar honaa chaahiye manzilein khud baDh ke chumeingi tire 'naazir' qadam dil mein lekin jazba-e-isaar honaa chaahiye"

"ai khudaa shahr-e-mohabbat mein kabhi aisaa na ho bhuuk se betaab koi bhi yahaan bachcha na ho kyaa khabar us shakhs ko majburiyaan hoti hain kyaa ghurbat-o-iflaas ko jis ne kabhi dekhaa na ho chaahtaa huun main ki laa-mahdud ho meraa khayaal daaere ki shakl mein ye ik jagah simTaa na ho jo miri taqdir mein likkhaa thaa mujh ko mil gayaa ab miri aankhon mein yaarab dusraa chehra na ho be-sar-o-saamaaniyon mein zindagi jiitaa huun main ai khudaa dushman ko bhi ye dukh mile aisaa na ho tum mujhe apnaa kaho main bhi tumhein apnaa kahun jaan-e-man ye pyaar duniyaa mein kabhi rusvaa na ho chaahtaa huun main yahi 'naazir' ki sab se ho nibaah mere honTon par kabhi ahbaab kaa shikva na ho"

"is kharaabe mein buraa kaun hai achchhaa kyaa hai mere bachcho abhi tum logon ne dekhaa kyaa hai main huun tahzib ke maathe ki sunahri tahrir ghaur se dekho mire chehre pe likkhaa kyaa hai hausla dil kaa baDhaa aur javaan rakh himmat apni mahrumi-e-qismat pe sisaktaa kyaa hai meraa kirdaar to suraj ki tarah hai raushan lab-e-naazuk pe tire phir miraa shikva kyaa hai mujh se izhaar-e-mohabbat ki hui gustaakhi ek mujrim ke liye aap ne sochaa kyaa hai apne hi haathon se aabaa ki viraasat kho kar aaj is haalat-e-naa-gufta pe rotaa kyaa hai dekhtaa hai mujhe chhup-chhup ke jo har dam 'naazir' mujh ko maa'lum nahin vo miraa lagtaa kyaa hai"

"har taraf rangin fazaa hai chaand bhi pur-nur hai teri aamad ki khabar se dil bahut masrur hai tere maikhaane kaa saaqi ye 'ajab dastur hai koi tishna-lab hai mahfil mein koi makhmur hai 'aib kyaa pinhaan hain is mein ye kisi ko kyaa khabar apne apne husn par har aadmi maghrur hai kitnaa sachchaa hai ye ahl-e-daanish-o-binish kaa qaul aadmi aazaad ho kar bhi baDaa majbur hai 'aam insaan us se vaaqif hi nahin to is se kyaa halqa-e-she'r-o-adab mein vo bahut mashhur hai dil ko kar lo pahle ikhlaas-o-muravvat-aashnaa phir tumhaaraa faisla har shakhs ko manzur hai har ghaDi rahtaa hai 'naazir' tere dar ke aas-paas kaun kahtaa hai miraa ghar tere ghar se duur hai"

"jise hunar hi nahin ghar ki sarbaraahi kaa vo roz dekhtaa hai khvaab baadshaahi kaa sabhi to karte hain daa'vaa-e-paarsaai yahaan pata kisi ko nahin qalb ki siyaahi kaa uThi jo haq ki sadaa to nikal paDe ghar se zaraa bhi khauf nahin gaanv ki tabaahi kaa ghalat kahun to gunahgaar sach kahun to buraa baDaa hi sakht hai ye kaam bhi gavaahi kaa ye raasta hai kabhi raasta nahin thaktaa takaan sirf muqaddar huaa hai raahi kaa ye aur baat mujhe qaid kar do tum lekin subut rakhtaa huun main apni be-gunaahi kaa bahut hasin hai tiraa tarz-e-zindagi 'naazir' javaab koi nahin teri kaj-kulaahi kaa"

"rusvaaiyaan hon laakh magar chaahiye mujhe is shahr-e-dil-navaaz mein ghar chaahiye mujhe mujh ko tire jamaal-e-nazar ki hai justuju jugnu na kahkashaan na qamar chaahiye mujhe is daur-e-pur-fitan mein jo dil ko milaa sake duniyaa mein koi aisaa bashar chaahiye mujhe jitnaa hai mere bas mein vo sab kuchh karungaa main thoDaa saa teraa husn-e-nazar chaahiye mujhe tere labon se ek tabassum kaa hai savaal main jaa rahaa huun rakht-e-safar chaahiye mujhe jitnaa bhi meraa haq hai mujhe sab na do magar kuchh to mire 'amal kaa samar chaahiye mujhe kartaa rahun hamesha tiraa naam sar-buland ik sar kaTe to dusraa sar chaahiye mujhe 'naazir' sahungaa kis tarah sahraa ki tez dhuup raahon mein saaya-daar shajar chaahiye mujhe"

"ho gae bichhDe hue un ko zamaane kitne dil mein mahfuz abhi tak hain fasaane kitne ek maa'muli si taklif pe kyon chikh uThe zindagi hai to abhi dukh hain uThaane kitne kar liyaa 'ahd to phir us ko nibhaanaa sikho tum banaate ho har ik roz bahaane kitne aur hote hain jinhein hoti hai daulat ki talab ham ne Thukraa diye duniyaa ke khazaane kitne yunhi aa jaane se didaar nahin ho saktaa ik jhalak paane mein lagte hain zamaane kitne us ke lahje mein takabbur ki ramaq hai ab bhi roz gintaa hai vo tasbih ke daane kitne shaa'iri ham ko viraasat mein mili hai 'naazir' kah gae giit ghazal aur taraane kitne"

"har jagah teri vakaalat bhi kahaan tak karte sab se laDne ki jasaarat bhi kahaan tak karte ik tajalli ne uDaa Daale sabhi hosh-o-havaas tuur ki aap ziyaarat bhi kahaan tak karte nafratein bo ke mohabbat kaa samar DhunDte hain is tarah ulTi zaraa’at bhi kahaan tak karte shiddat-e-karb se aankhon mein na Thahre aansu ham tire gham ki hifaazat bhi kahaan tak karte apne bigDe hue haalaat se jo laDte hain mujh pe vo chashm-e-'inaayat bhi kahaan tak karte ab vo mausam na rahaa 'ishq-o-mohabbat kaa sanam ham tire saath sharaarat bhi kahaan tak karte is qadar log masaail mein ghire hain 'naazir' ham ko aasuda-e-raahat bhi kahaan tak karte"

"tum shaad raho mauj-e-sabaa bol rahi hai har roz yahi taaza havaa bol rahi hai ham log kabhi saahab-e-sarvat the yahaan par jismon ki ye bosida qabaa bol rahi hai koi to mujhe aa ke yahaan apne banaa le haathon ki hatheli pe hinaa bol rahi hai tufaan-e-havaadis kaa tumhein khauf na hogaa honTon pe buzurgon ke du'aa bol rahi hai ye to kabhi aslaaf ki dastaar thi mere jo sar pe hai tere vo ridaa bol rahi hai sar-taa-ba-qadam husn-e-mujassam vo lage hai lahraati hui baad-e-sabaa bol rahi hai allaah kaa farmaan hai uTh jaao rafiqo honTon pe muazzin ke sadaa bol rahi hai"