Ghazal

"zindagi ki bahaar le ke chale daaman-e-taar-taar le ke chale gul-rukhaan-e-chaman ki mahfil se sina-e-sad-figaar le ke chale aah ye khvaab-e-ishq ki taabir aalam-e-intizaar le ke chale be-qaraari mein umr guzri thi aaj dil kaa qaraar le ke chale paa gae raaz-e-khanda-e-gul ham dida-e-ashk-baar le ke chale mil gai daad-e-aabla-paai pursish-e-nok-e-khaar le ke chale zabt-e-gham kaa 'jamaal' hai ye sila taana-e-gham-gusaar le ke chale"

"jangal jangal sahraa sahraa sirf gham-e-uftaad hue ahl-e-junun par ishq ki rahmat viraane aabaad hue kal tak jo maasum-sifat the aaj vahi jallaad hue rafta rafta shaikh-o-barahman kitne sitam-ijaad hue mausam-e-gul ke aate aate gulchinon ki saazish se kitne girebaan chaak hue hain kitne ghar barbaad hue daam-e-havas har ek nafas hai barq-e-hasad har ek nazar nazm-e-gulistaan kyun-kar badle said bhi ab sayyaad hue sadiyon ke is ujDe chaman ki khuun se gul-kaari hogi sunte hain arbaab-e-mohabbat zindaan se aazaad hue puchhe koi arbab-e-jafaa se ab ye pashemaani kab tak muddat guzri ahl-e-vafaa par taaza sitam ijaad hue be-adabi mein jo yaktaa hain Thahre imaam-e-bazm-e-adab jin ko sher na kahnaa aaya fan ke vahi ustaad hue daagh-e-judaai ke sadmon se kyaa guzri hai kis se kahun kaise kaise phuul chaman ke nazr-e-gham-e-bedaad hue teri khushi se ham ko gharaz hai teri razaa se kaam hamein shaad hue ham teri khaatir tere liye naashaad hue qaamat-e-mauzun ke afsaane sehn-e-chaman tak jaa pahunche khush-andaam-e-fasl-e-bahaaraan sard hue shamshaad hue ahd-e-taghaaful kaa afsaana un se 'jamaal' ab kyaa kahiye lutf-o-karam sab bhuul gae ham jaur-o-sitam sab yaad hue"

"phir taqaazaa hai ki tajdid-e-vafaa ho jaae khun-e-dil nazr karo farz adaa ho jaae ham hain sarshaar-e-mohabbat na shikaayat na gila aap ko uzr hai to uzr-e-jafaa ho jaae tishna-lab koi na rah jaae tiri mahfil mein jashn hai aaj to rindon kaa bhalaa ho jaae teraa mai-khaana salaamat rahe aabaad rahe saaqiyaa ham ko bhi ik jaam ataa ho jaae sust-gaami se nahin tab-e-ravaan ko nisbat jaada-e-shauq pe aae to havaa ho jaae yuun taDap ai dil-e-betaab ki dhaDkan se tiri barq-raftaar zamaane ki fazaa ho jaae zaalimo soch lo anjaam-e-sitam kyaa hogaa aaj kaa din hi agar roz-e-jazaa ho jaae ahl-e-dil kaif-e-mohabbat hai usi ke dam se dard-e-dil aur sivaa aur sivaa ho jaae mai-kasho aao chalo shaikh-o-barahman se milein raat kaa pichhlaa pahar sarf-e-duaa ho jaae subh ho jaae to manzil ki taraf tez qadam is qadar tez ki shal baang-e-daraa ho jaae raah mein dair-o-haram aaein to sajda kar lo shaayad is tarah gharibon kaa khudaa ho jaae"

"yunhi chupke chupke ronaa yunhi dil hi dil mein baatein baDi kashmakash ke din hain baDi uljhanon ki raatein hai nafas nafas farozaan hai mizha mizha charaaghaan baDi dhuum se uThi hain gham-o-dard ki baraatein mire zehn ki khalaa mein mire dil ki vusaton mein kahin rang-o-bu ke kheme kahin nuur ki qanaatein unhein ai gham-e-zamaana kabhi raaegaan na karnaa hain bahut latif-o-naazuk gham-e-dil ki vaardaatein ye 'jamaal' mai-kada hai nahin yaan koi takalluf o arab ajam ke jhagDe na hasab nasab na zaatein"

"talaash-e-kaun-o-makaan hai na laa-makaan ki talaash ye zindagi hai gham-e-ishq-e-jaavedaan ki talaash isi zamin ko hamein aasmaan banaanaa hai hamein nahin hai kisi aur aasmaan ki talaash kisi ko manzil-e-ishrat kaa gham hai aur mujhe hui hai manzil-e-ishrat pe kaarvaan ki talaash ye khvaab hai ki hai taabir-e-khvaab ai gham-e-dil har ik qadam hai yahaan umr-e-raaegaan ki talaash bahaar-e-laala-o-gul barq-e-be-amaan nikli kahaan kahaan na rahi mere aashiyaan ki talaash jo ho sake to miraa gham hi jaavedaan ho jaae 'jamaal' mujh ko nahin aish-e-jaavedaan ki talaash"

"jo muddaaa hai dilon kaa yahaan nahin miltaa jahaan-e-raaz hai raaz-e-jahaan nahin miltaa jo kaifiyat hai khamoshi mein vo bayaan mein nahin bayaan karun bhi to lutf-e-bayaan nahin miltaa junun ki raah mein ye kaun saa maqaam aayaa ki ab suraagh-e-zamaan-o-makaan nahin miltaa na ab zamin ki khabar hai na aasmaan ki khabar mire hi naqsh-e-qadam kaa nishaan nahin miltaa khizaan mein ahl-e-nasheman ko thaa bahaar kaa gham bahaar aai to ab aashiyaan nahin miltaa har ek yuun to hai aadaab-e-ishq se vaaqif mire junun kaa magar raazdaan nahin miltaa mohabbaton mein kami kyaa hui ki siine mein vo be-qaraar dil-e-bad-gumaan nahin miltaa hanuz khatm nahin justuju-e-maah-vishaan abhi to zer-e-qadam aasmaan nahin miltaa fazaa-e-laala-o-gul sard hoti jaati hai 'jamaal' saa koi shoala-bayaan nahin miltaa"

"kahaan le jaaun dil ko yaa-ilaahi gunah Thahri hai meri be-gunaahi panaah-e-har-do-aalam ban gai hai junun-e-ishq teri be-panaahi dilon par kar gai hai sehr kyaa kyaa hasinon ki adaa-e-kam-nigaahi ye aahaT hai usi sarv-e-ravaan ki dil-e-betaab detaa hai gavaahi takalluf-bartaraf ye mai-kada hai nahin yaan raah-o-rasm-e-uzr-khvaahi jigar ke saath duniyaa-e-adab se hui rukhsat vo shaan-e-kaj-kulaahi 'majaaz' ab lakhnau tujh bin hai suunaa fughaan-e-shab na aah-e-subh-gaahi shuur-e-manzil-e-nau aaj bhi hai tiri laghzish tiri gum-karda-raahi mubaarak ho tujhe ai khaana viraan jahaan-e-mai-kada ki baadshaahi giraan hai taaj-daaraan-e-chaman par asiraan-e-qafas ki daad-khvaahi maaal-e-hasrat-e-taamir kyaa hai 'jamaal' apne bhare ghar ki tabaahi"

"gulon ko shoala mizaaji sikhaai jaati hai chaman ki aag chaman mein lagaai jaati hai junun-e-firqa-parasti are maaaz-allaah har ik qadam pe qayaamat uThaai jaati hai vo aag jis ne mire gulsitaan ko phunk diyaa nigaah-e-shaikh-o-barahman mein paai jaati hai hamin pe khatm nahin kufr-e-ishq ai naaseh buton ke saath khudaa ki khudaai jaati hai nahin ye gham ki rasaa naala-e-hazin na hue falak pe aaj miri naa-rasaai jaati hai ab un ke qaul-o-qasam par nahin hai dil ko yaqin sitamgaron se kahin bevafaai jaati hai in aansuon ko na kar raaegaan are naadaan kahin ye daulat-e-gham yuun luTaai jaati hai mafar shamaatat-e-ham-saaya se 'jamaal' nahin ye barq girti nahin hai giraai jaati hai"

"samjhe the be-khabar jinhein hushyaar vo bhi hain saaqi is anjuman ke nigah-daar vo bhi hain jin ke lahu se daaman-e-sahraa hai laala-rang ai nargis-e-chaman tire bimaar vo bhi hain arbaab-e-mai-kada se 'abas zid hai shaikh ko khush-fikr-o-khush-mizaaj-o-khush-atvaar vo bhi hain laa-e-giraan-bahaa ko samajhte hain jo khazaf yaa-rab mataa-e-dil ke kharidaar vo bhi hain chup hain vo sun ke aaj miri daastaan-e-gham insaaf kyaa karein ki khataavaar vo bhi hain taufiq jin ko maasiyat-e-ishq ki nahin ai rahmat-e-tamaam gunahgaar vo bhi hain khud apne haal ki bhi jinhein kuchh khabar nahin dair-o-haram ke mahram-e-asraar vo bhi hain bad-tar hain dushmanon se kuchh aise bhi hain rafiq jin ko shu'ur-e-gham nahin gham-khvaar vo bhi hain samjhe hain jo hayaat ko khvaab-e-giraan 'jamaal' zid hai unhein ki shaair-e-bedaar vo bhi hain"

"saaqi bhi mai-e-gulfaam bhi hai rindon ko salaa-e-aam bhi hai gardish mein chhalaktaa jaam bhi hai bahkein to magar ilzaam bhi hai sab kuchh main luTaa detaa lekin kyaa kahiye ki un ki nazron mein hushyaari ki talqin bhi hai sar-masti kaa paighaam bhi hai tanvir-e-numud-e-subh bhi hai aariz ke damakte jalvon mein zulfon ke machalte saae mein tasvir-e-savaad-e-shaam bhi hai ai dil ye junun ki manzil hai kuchh sud-o-ziyaan ki fikr na kar har gaam pe yaan rahrav ke liye aaghaaz bhi hai anjaam bhi hai ab dair-o-haram ki shorish ko ai vaaiz-e-naadaan bhuul bhi jaa ye bazm ki bazm-e-rindaan hai yaan kufr bhi hai islaam bhi hai shohrat bhi mili izzat bhi mili lekin ye 'jamaal'-e-naghma-saraa dil-gir bhi hai barbaad bhi hai naashaad bhi hai naakaam bhi hai"