Ghazal

"ishq mein kyaa khoyaa kyaa paayaa main bhi sochun tu bhi soch kyaa ye tasavvur zehn mein aaya main bhi sochun tu bhi soch har chehre par chehra ho to kaise ham pahchaaneinge kaun hai apnaa kaun paraayaa main bhi sochun tu bhi soch qabr mein jaa kar miTTi mein mil jaane vaali miTTi ko yaaron ne phir kyon nahlaayaa main bhi sochun tu bhi soch tu bhi qaatil main bhi qaatil maqtal ham donon ke dil kis ne kis kaa khuun bahaayaa main bhi sochun tu bhi soch phuul khilaataa thaa jo kal tak aaj vo kaanTe botaa hai farq ye is mein kaise aaya main bhi sochun tu bhi soch duniyaa bhi ik sarmaaya hai uqbaa bhi ik sarmaaya kaun saa achchhaa hai sarmaayaa main bhi sochun tu bhi soch jab tak suraj sar pe nahin thaa saath 'mayank' ye chaltaa thaa paanv tale ab kyon hai saayaa main bhi sochun tu bhi soch"

"jo bhi tere qarib hai yaa-rab vo jahaan kaa habib hai yaa-rab koi ghamgin hai koi khush hai apnaa apnaa nasib hai yaa-rab tu hi zaahir hai tu hi baatin hai teri hasti ajiib hai yaa-rab jis pe teri nazar na ho aisaa ahl-e-zar bhi gharib hai yaa-rab tu ne qaatil banaa diyaa jis ko vahi meraa tabib hai yaa-rab aaj har shakhs ke gale mein kyon ik nishaan-e-salib hai yaa-rab duur nazron se hai jahaan ki 'mayank' vo jo tere qarib hai yaa-rab"

"hichkiyaan le ke na ro qabr pe rone vaale jaag jaaein na kahin chain se sone vaale naa-khudaaon pe yaqin soch-samajh kar karnaa laa ke saahil pe Dubote hain Dubone vaale fasl-e-nau talkh na hogi to bhalaa kyaa hogi biij zahrile agar boeinge bone vaale qatra qatra mire is khuun ki gavaahi degaa laakh daaman se lahu dho miraa dhone vaale kyaa milegaa tujhe zardaar se nafrat ke sivaa pairahan apnaa pasine mein bhigone vaale dekh ai gardish-e-dauraan nahin Takraa ham se sar pe tanhaai kaa ham bojh hain Dhone vaale krishn ki raadhaa se kah do ki zamaane mein 'mayank' ab vo andaaz kahaan shyaam salone vaale"

"ranj-o-gham dard-o-alam aah-o-fughaan hai zindagi saikDon unvaan ki ik daastaan hai zindagi jal rahe hain khaar-o-khas un kaa dhuaan hai zindagi shaakh-e-gul par ik sulagtaa aashiyaan hai zindagi dekhiye to ik habaab-e-mauj-e-dariyaa bhi nahin sochiye to ek bahr-e-bekaraan hai zindagi farsh-e-geti par farishton ne bhi himmat haar di vo gham-e-dil-doz vo baar-e-garaan hai zindagi dard-o-kulfat se na ghabraa ai 'mayank' is daur mein sabr-o-istiqlaal kaa ik imtihaan hai zindagi"

"tum nahin ho saath to saaraa jahaan tanhaa lage ye zamin tanhaa lage ye aasmaan tanhaa lage jab se dil ko aa gayaa tere na aane kaa yaqin hasraton ki bhiiD mein ab ye makaan tanhaa lage kaun jaane vahshat-e-dil ko hai kis kaa intizaar hain hazaaron phuul phir bhi gulsitaan tanhaa lage shukr hai dard-e-mohabbat raas mujh ko aa gayaa zindagi kaa ab koi lamha kahaan tanhaa lage donon jaanib ek hi manzar hai furqat mein ayaan main faqat tanhaa nahin vo bhi vahaan tanhaa lage ittihaad-e-baahami jab se nahin hai ai 'mayank' kaarvaan ke saath mir-e-kaarvaan tanhaa lage"

"dard mein lab par aah na laanaa sab ke bas ki baat nahin hanste hanste ashk chhupaanaa sab ke bas ki baat nahin ham ne ik zaalim ko apnaa dil de kar ye jaanaa hai patthar se shisha Takraanaa sab ke bas ki baat nahin shaam-e-alam palkon par apni raushan hain ashkon ke diye yuun chaahat kaa jashn manaanaa sab ke bas ki baat nahin duniyaa ki parvaah na kar ke ham ne pyaar kiyaa un se dosh-e-havaa pe diip jalaanaa sab ke bas ki baat nahin gulshan se gul chun ke sajaanaa apne ghar ko aasaan hai sahraa sahraa phuul khilaanaa sab ke bas ki baat nahin haae vo lab khaamosh kisi ke uf vo kisi ki nichi nazar kuchh bhi na kah kar sab kah jaanaa sab ke bas ki baat nahin jo bhi kahaa vo kar ke dikhaayaa ham ne mohabbat mein ai 'mayank' kahnaa aur phir kar ke dikhaanaa sab ke bas ki baat nahin"

"zindagi kyon hui vaqf-e-gham-o-aalaam na puchh mujh se ai dost mire ishq kaa anjaam na puchh kaun hai kis ne banaa rakkhaa hai divaana mujhe ham-nashin aql se pahchaan magar naam na puchh us ki naakaam tamanna ko samajh ai sayyaad murgh-e-dil aa gayaa kyon khud hi tah-e-daam na puchh ho ke mahrum tire lutf-o-karam se ai dost kis tarah main ne guzaare sahar-o-shaam na puchh ishq-e-khuddaar ki azmat ko samajh aaj 'mayank' be-naqaab aa gayaa kyon koi lab-e-baam na puchh"

"qissa-e-dard-e-jigar kis se kahun kaise kahun ye mohabbat kaa asar kis se kahun kaise kahun raat bhar sham-e-nazar raushan kiye baiThaa rahaa vo na aae taa-sahar kis se kahun kaise kahun dil miraa betaab hai kis ki tajalli ke liye kyon pareshaan hai nazar kis se kahun kaise kahun kaun hai aakhir vo kis ke naqsh-e-paa ke vaaste muntazir hai rahguzar kis se kahun kaise kahun puchhne ko aae hain ahbaab meraa haal-e-dil kahnaa to chaahun magar kis se kahun kaise kahun kaise kaise dukh uThaae main ne raah-e-shauq mein daastaan-e-pur-asar kis se kahun kaise kahun baais-e-rahmat hai yaa hai baais-e-zahmat 'mayank' ik mohabbat ki nazar kis se kahun kaise kahun"

"hamaare par hain shikasta uDaan baaqi hai nayaa hai azm-e-safar aan-baan baaqi hai tumhaaraa faisla manzur ho mujhe kaise abhi to hone ko meraa bayaan baaqi hai vatan pe sainkaDon jaanein nisaar kar deinge dilon mein azmat-e-hindostaan baaqi hai ye kam nahin ki zamaane mein aaj zinda huun ki do jahaan mein miraa mehrbaan baaqi hai tum apne tir-e-nazar baarhaa chalaate raho abhi to jism mein kuchh aur jaan baaqi hai ye kah ke lete hain mere mazaar ke bose yahi to ahl-e-vafaa kaa nishaan baaqi hai hamaare vaaste koi bhi chhat nahin hai 'mayank' hamaare sar pe magar aasmaan baaqi hai"

"main ne kahaa ho jalva-gar us ne kahaa nahin nahin main ne kahaa milaa nazar us ne kahaa nahin nahin main ne kahaa ye shaam hai us ne kahaa ye jaam hai main ne kahaa to jaam bhar us ne kahaa nahin main ne kahaa kahaan milein us ne kahaa jahaan kahin main ne kahaa ki baam par us ne kahaa nahin nahin main ne kahaa ki rukh idhar us ne kahaa hai chashm-e-tar main ne kahaa ki sabr kar us ne kahaa nahin nahin main ne kahaa ki ho nazar us ne kahaa kahaan kidhar main ne kahaa 'mayank' par us ne kahaa nahin nahin"