Ghazal

"dil kaa sikka kahin chalaa hi nahin khoT kyaa thaa mujhe pata hi nahin bas lakirein hi khinch di main ne pyaar tasvir mein bharaa hi nahin naa-khudaa ho gayaa khafaa mujh se to kinaaraa mujhe milaa hi nahin baat karni thi dil ko tujh se magar tu ne siine pe sar rakhaa hi nahin zehn mein bus gayaa qafas jis ke vo parinda kabhi uDaa hi nahin"

"kami ko us ki miri raftagi ne kaaT diyaa pahaaD gham kaa ye baada-kashi ne kaaT diyaa ghanaa darakht mohabbat kaa sehn mein thaa mire magar vo jis ne lagaayaa usi ne kaaT diyaa bichhaD ke us se safar zindagi kaa thaa mushkil ye raasta miri aavaargi ne kaaT diyaa use main apni taraf khinchne hi vaali thi tabhi patang kaa maanjhaa kisi ne kaaT diyaa"

"taa-qayaamat 'ishq ki jaadu-gari jaari rahe un nigaahon ko miri surat sadaa bhaati rahe phuul ki aaghosh mein madhosh jab titli rahe phuul chaahe vaqt ke baaham havaa dhimi rahe zindagi bhar paas us ke main rahun kuchh is tarah jis tarah se ik hiran ke paas kasturi rahe jism par poshaak saada main pahan lungi magar shawl par us ke mire haathon ki gul-kaari rahe us ke bin bhaari lage din ki guzarti har ghaDi aur tanhaa raat meri jaan ki bairi rahe haae puure chaand ki ye raat kyon us ke binaa chaandni tan-man jalaane ke liye hansti rahe ye mohabbat se bhari us ki nazar mujh par sadaa raat mein shabnam si din mein dhuup si bikhri rahe band kamre mein khuli hain chiTThiyaan mahbub ki khiDkiyon se mausam-e-gul Toh letaa hi rahe"

"'adaavat haath ke patthar ko shishe se nibhaani hai mire hi 'aks ko mujh se zaraa si bad-gumaani hai guzaari haadse ke saath main ne zindagi puuri buri ik yaad mere zehn se mujh ko miTaani hai mire sach bolne se sab ke sab honge khafaa yaa'ni mujhe naaraazgi khaamosh rah kar hi jataani hai havaaon ki sharaarat dekh le ab ghaur se tu bhi inhein bas phuul par baiThi hui titli uDaani hai tiri tasvir apne haath se main ne banaai jo mujhe vo raat-din har roz siine se lagaani hai nadi chaahat bhari jo kohsaaron se lagi bahne use to tishnagi khaare samundar ki bujhaani hai"

"tum ne jo insaan ho kar baat insaani nahin ki kar to sakte the koi harkat jo shaitaani nahin ki kyon hamein buniyaad hone ki ghalat-fahmi rahi ye kyon hamaare dil ne saari 'umr man-maani nahin ki paas koi jo sunaane ke liye qissa nahin hai ho rahaa afsos ye kyon ham ne naadaani nahin ki dhuup mein ik peD kaa saayaa mayassar ho gayaa to baadalon ki chhaanv ki har vaqt nigraani nahin ki jo charaaghon ki tarah jalte rahe us raat ko ham to khudaa ne bhi havaa us roz tufaani nahin ki raaz saare khul gae naakaam dil ke tab hamaare dil-jale ki baat par jab ham ne hairaani nahin ki ham ne ik 'maa'sum' ko jab bechte dekhaa khilaune phir kabhi harkat hamaare dil ne bachkaani nahin ki"

"haath par titli biThaanaa chaahti huun main gulon kaa dil jalaanaa chaahti huun panchhiyon ko bhi mile ghar is liye main peD aangan mein lagaanaa chaahti huun ik jhalak apni dikhaa maulaa mujhe bhi khud ko main tujh par luTaanaa chaahti huun main qafas toDun to khiDki khol denaa qaid se khud ko uDaanaa chaahti huun phuul tu ne khat mein bhejaa vo dikhaa kar main khizaan ko munh chiDhaanaa chaahti huun"

"bahut hi khush hai zamaana miraa buraa kar ke main thak gai huun zamaane se ab vafaa kar ke mujhe pasand nahin zindagi qafas teraa zaraa si bakhsh mujhe raahatein rihaa kar ke mujhe nasib se ik dost hai milaa aisaa ghamon ko khatm kare hai gale lagaa kar ke abhi yaqin ki shaakhein bahut hi naazuk hain na phuul toDo sanam Daaliyaan jhukaa kar ke miri na pyaas bujhi khvaab mein milaa mujh ko saraab saunp gayaa vo nazar churaa kar ke"