Ghazal

"mujh se behtar to mil gayaa hai tumhein aur allah se kyaa gila hai tumhein ham ikaTThe nahin raheinge kabhi mere bachchon kaa to pataa hai tumhein main tumhein dekh bhi nahin saktaa dekhnaa bhi to masala hai tumhein yaani tum itni khubsurat ho chhoTaa bachcha bhi dekhtaa hai tumhein main tumhaaraa agar bataa bhi duun log puchheinge aur kyaa hai tumhein jo kisi ko kabhi nahin hotaa kitni aasaani se huaa hai tumhein"

"duniyaa ko shaandaar kaa matlab nahin pataa matlab hamaare yaar kaa matlab nahin pataa main ne kahaa talaash karungaa kahaan tumhein us ne kahaa qataar kaa matlab nahin pataa vo vaqt par mile na mile faaede mein huun vo yuun ki intizaar kaa matlab nahin pataa allah kare tum aankhein dikhaao kabhi use jis shakhs ko khumaar kaa matlab nahin pataa bebaak aadmi huun magar huun to aadmi sharm aa rahi hai pyaar kaa matlab nahin pataa"

"ek dafa jo tire zer-e-asar andhaa huaa agli dafa bhi vahi hogaa agar andhaa huaa mere andar raushni thi khuun to thaa hi nahin vaar karne vaalaa pahle vaar par andhaa huaa vo nazar aataa hai to phir kuchh nazar aataa nahin us ko jis jis ne bhi dekhaa umr bhar andhaa huaa sab usi ko dekh kar aae hain raah-e-ishq par jis kaa aaghaaz-e-safar mein ham-safar andhaa huaa aankhein khul jaati hain jis haalat mein khud ko dekh kar main usi haalat mein us ko dekh kar andhaa huaa us ko aankhein mil gaiin ghar mein hamesha ki tarah main hamesha ki tarah auron ke ghar andhaa huaa us ne ik andhe ko tohfe mein chhaDi kyaa bhej di dekhte hi dekhte saaraa nagar andhaa huaa mere andhe-pan kaa auron ne uThaayaa faaeda vo jidhar hotaa nahin thaa main udhar andhaa huaa aise andhe ki hukumat hai hamaare mulk mein jis ko ye bhi kah nahin sakte kidhar andhaa huaa"

"hasin auraton ko chhoD kar ajab sab the koi hamaaraa na thaa saahib-e-nasab sab the main sirf is liye zinda huun jab azaab aae to us se aankhein milaa kar kahun ki sab sab the hasin aurtein lashkar mein bharti kar di gaiin shikast ho gai dushman ko kyunki ab sab the qayaamat aai to shikve ke taur par main ne mazaaq uDaayaa kahaan rah gai thi jab sab the do-chaar log mareinge tumhaare aane par ziyaada der lagaa di hai tum ne tab sab the alif giraane ko bhi shirk jaante the ham khudaa pukaarte to kaise zer-e-lab sab the hujum kahne lagaa aasmaan se hai koi aur us ne haan kahaa phir is ke baad kab sab the hamaare paas alag hone kaa bahaanaa thaa hamaari pahli mulaaqaat kaa sabab sab the"

"tujhe meri khamoshi se bhi andaaza nahin hotaa ki main ab sirf baaton se tar-o-taaza nahin hotaa tiraa aanaa bhi dekhegaa tiraa jaanaa bhi har koi mahal ki tarah ghar mein chor-darvaaza nahin hotaa natijon se bhari duniyaa mein paidaa hone vaalon kaa bharosa to bahut hotaa hai khamyaaza nahin hotaa tiri aavaaz bhaari hoti to suntaa nahin koi tire paanv nahin hote to aavaaza nahin hotaa vo jis ki ek Thokar se hamaari khaak uDti hai usi ke paas gaalon ke liye ghaaza nahin hotaa use in shaairon se taaza phulon ki tavaqqo hai ki jin ki shaairi mein sher bhi taaza nahin hotaa bichhaDte vaqt ham donon ki haalat ek jaisi thi bikharte vaqt jaise koi shiraaza nahin hotaa"

"bhaai kamaal kar diyaa divaar khinch kar pahle ye kaam hotaa thaa talvaar khinch kar itnaa jhukaa diyaa hai tire hijr ne mujhe bachcha bhi sar se le gayaa dastaar khinch kar kirdaar bhi dikhaataa agar shakl ki tarah de maarte zamin pe mujhe yaar khinch kar ye kaaenaat mere takhayyul se chhoTi hai dekhaa hai is ko main ne kai baar khinch kar naukar nahin samajhtaa zabaan ko main kaan kaa paDhtaa nahin huun is liye ashaar khinch kar"

"kis ko raushan banaa rahe ho tum itnaa jo bujhte jaa rahe ho tum log paagal banaae jaa chuke hain ab nayaa kyaa banaa rahe ho tum gaanv ki jhaaDiyaan bataa rahi hain shahr mein gul khilaa rahe ho tum ek to ham udaas hain us par shaairon ko bulaa rahe ho tum aur kis ne tumhein nahin dekhaa aur kis ke khudaa rahe ho tum phuul kis ne qubul karne hain jab talak muskuraa rahe ho tum"

"abhi to zinda hain kahte ho yaaraa kyaa hogaa hamaare baad na jaane tumhaaraa kyaa hogaa hamaaraa khud pe guzaaraa nahin hai muddat se hamaare saath kisi kaa guzaaraa kyaa hogaa vo mere saath gharibi mein bhi bahut khush hai shab-e-siyaah jab aai sitaara kyaa hogaa ye dekhne ke liye kyon na ek din mar jaaein hamaare saath usi din dobaara kyaa hogaa vo jis ke nisf ne paagal kiyaa hai duniyaa ko main sochtaa huun haqiqat mein saaraa kyaa hogaa hamaare naqsh-e-qadam se qadam milaao magar hamaaraa kuchh na banaa to tumhaaraa kyaa hogaa zabaan lipTi hui hai gale se murde ki savaal ye nahin kaise pukaaraa kyaa hogaa vo mil ke jaae to lagtaa nahin milaa hai kabhi agar kinaara kare to kinaara kyaa hogaa jinhein pataa thaa sabhi kuchh vo log bhi na rahe hamein pataa hi nahin kuchh hamaaraa kyaa hogaa pahan liyaa hai use aankh muund kar main ne vagarna sochtaa rahtaa utaaraa kyaa hogaa"