Ghazal

nishaan kisi ko milegaa bhalaa kahaan meraa

ki ek ruuh thaa main jism thaa nishaan meraa

har ek saans nayaa saal ban ke aataa hai

qadam qadam abhi baaqi hai imtihaan meraa

· · ·

shab ke khilaaf barsar-e-paikaar kab hue

ham log raushni ke talabgaar kab hue

khushbu ki ghaat mein hain shikaari havaaon ke

jhonke magar kisi se giraftaar kab hue

· · ·

ik vahm ki surat sar-e-divaar-e-yaqin hain

dekho to hain maujud na dekho to nahin hain

ham se kashish-e-mauja-e-raftaar na puchho

ham ahl-e-mohabbat to giraftaar-e-zamin hain

· · ·

shab bhali thi na din buraa thaa koi

jaisaa ji ko tire lagaa thaa koi

ashk the kirchiyaan thiin aankhein thiin

aaine se umanD paDaa thaa koi

· · ·

ai mah-e-hijr kyaa kahein kaisi thakan safar mein thi

ruup jo rahguzar mein the dhuup jo rahguzar mein thi

lafz ki shakl par na jaa lafz ke rang bhi samajh

ek khabar pas-e-khabar aaj ki har khabar mein thi

· · ·

vahi raTe hue jumle ugal rahaa huun abhi

giraft-e-harf se baahar nikal rahaa huun abhi

vo ek tu ki havaa ki tarah guzar bhi chukaa

vo ek main ki faqat haath mal rahaa huun abhi

· · ·

andhe badan mein ye sahar-aasaar kaun hai

tu bhi nahin to mujh mein sharar-baar kaun hai

vo kaun hai jo jaagtaa hai meri niind mein

asraar main huun saahab-e-asraar kaun hai

· · ·

pairahan uD jaaegaa rang-e-qabaa rah jaaegaa

phuul ke tan par faqat aks-e-havaa rah jaaegaa

ham to samjhe the ki chaaron dar muqaffal ho chuke

kyaa khabar thi ek darvaaza khulaa rah jaaegaa

· · ·

ishq-aabaad faqiron ki adaa rakhte hain

aur kyaa is ke sivaa ahl-e-anaa rakhte hain

ham tahi-dast kuchh aise bhi tahi-dast nahin

kuchh nahin rakhte magar paas-e-vafaa rakhte hain

· · ·

zard patton ko darakhton se judaa honaa hi thaa

ham ki dariyaa hain samundar ki ghizaa honaa hi thaa

aur kab tak be-samar rakhti khizaan peDon ke haath

rut badal jaanaa thi ye jangal haraa honaa hi thaa

· · ·

aasmaanon se zaminon pe javaab aaegaa

ek din raat Dhale yaum-e-hisaab aaegaa

mutmain aise ki har gaam yahi sochte hain

is safar mein koi sahraa na saraab aaegaa

· · ·

yaqin ne mujh ko asir-e-gumaan na rahne diyaa

ki us ne rabt koi darmiyaan na rahne diyaa

miri nazar hi samundar ki aakhiri had thi

miri thakan ne mujhe par-fishaan na rahne diyaa

· · ·

sar-e-niyaaz vo saudaa nazar nahin aataa

vo jaisaa pahle thaa vaisaa nazar nahin aataa

vo raat thi to basar ho gai bahar-surat

agar ye din hai to kaTtaa nazar nahin aataa

· · ·

kuchh is ke sivaa khvaahish-e-saada nahin rakhte

ham tujh se bichhaDne kaa iraada nahin rakhte

kab dil ki taraf lauT ke aaeinge safine

sahraa ke bagule gham-e-jaada nahin rakhte

· · ·

ek meri jaan mein aur ik lahar sahraaon mein thi

kuchh nukile sang the kuchh ret dariyaaon mein thi

kyaa huaa vo garm dopahron mein yakh honaa miraa

kyaa hui vo dhuup si lazzat ki jo chhaanv mein thi

· · ·

ki khud insaan Dhaltaa jaa rahaa hai

khalanDraa saa koi bachcha hai dariyaa

samundar tak uchhaltaa jaa rahaa hai

na kuchh kahtaa na kuchh suntaa hai koi

· · ·

zarurat kuchh ziyaada ho na jaae

samundar aur gahraa ho na jaae

ye dhun ye mauj le Duube na mujh ko

bagulaa gharq-e-sahraa ho na jaae

· · ·

aasmaan suraj sitaare bahr-o-bar kis ke liye

ye safar kis ke liye rakht-e-safar kis ke liye

vo hare din vo bhare mausam to kab ke jaa chuke

haath phailaae khaDe hain ab shajar kis ke liye

· · ·

khema-e-jaan ki tanaabon ko ukhaD jaanaa thaa

ham se ik roz tiraa gham bhi bichhaD jaanaa thaa

kaun se kaaj sanvarte hain tire hone se

kaun saa kaam na hone se bigaD jaanaa thaa

· · ·

tiraa rang-e-basirat hu-ba-hu mujh saa nikal aayaa

tujhe main kyaa samajhtaa thaa magar tu kyaa nikal aayaa

zaraa saa kaam paDte hi mizaaj ik khaak-zaade kaa

qad-o-qaamat main gardun se bhi kuchh unchaa nikal aayaa

· · ·

kiran to ghar ke andar aa gai thi

sunahri dhuup kyuun kajlaa gai thi

kuchh aisi be-hisi se pesh aayaa

ki meri be-kasi sharmaa gai thi

· · ·

thakan se chuur badan dhuul mein aTaa sar thaa

main jab giraa to mire saamne miraa ghar thaa

tahi-e-samar shajar-e-khvaab kuchh niDhaal se the

zamin pe sukhi hui pattiyon kaa bistar thaa

· · ·

naav khasta bhi na thi mauj mein dariyaa bhi na thaa

paar utartaa thaa magar tujh pe bharosa bhi na thaa

zindagi haath na de paai mire haathon mein

saath jaanaa bhi na thaa haath chhuDaanaa bhi na thaa

· · ·

dil ko har gaam pe dhaDke se lage rahte hain

tujh ko kho dene ke khadshe se lage rahte hain

sar to kaT jaate hain jismon se magar sadiyon tak

khaak par khuun ke dhabbe se lage rahte hain

· · ·