Ghazal

"sar pe suraj khaDaa hai chal uTh jaa kaam baaqi paDaa hai chal uTh jaa tujh ko duniyaa bhi fath karni hai ye taqaaza baDaa hai chal uTh jaa jism kahtaa hai yaar sone de aur dil ne kahaa hai chal uTh jaa khair ki baat hai ye samjhaa kar mashvara mashvara hai chal uTh jaa ruuh tak dhuup aa gai meri khvaab kahne lagaa hai chal uTh jaa"

"us par to kabhi dil kaa koi zor nahin thaa ham saa bhi zamaane mein koi aur nahin thaa jis vaqt vo rukhsat huaa baaraat ki maanind ik Tiis si uTThi thi koi shor nahin thaa viraan si is duniyaa mein ham kis se bahalte jangal thaa udaasi thi koi mor nahin thaa dil TuuT gayaa thaa to juDaate kahin jaa kar is kaam kaa duniyaa mein koi taur nahin thaa khanjar ki chubhan se hi main pahchaan gayaa thaa vo tu thaa mire dost koi aur nahin thaa"

"ek do raat mein shohrat nahin milti pagle itne saste mein ye daulat nahin milti pagle ho agar khauf-e-khudaa kaam banaa kartaa hai sirf misvaak se jannat nahin milti pagle main jo khud chal ke tiri zaat talak aaya huun varna yuun hai ke mohabbat nahin milti pagle ham ko zid thi ke yahi raasta chalnaa hai hamein varna har moD pe aafat nahin milti pagle sar paTakne se to bas khuun bahaa kartaa hai sar paTakne se to izzat nahin milti pagle"

"zahr to laa-javaab thaa us kaa din hi shaayad kharaab thaa us kaa jabki meraa savaal sidhaa thaa phir bhi ulTaa javaab thaa us kaa vo mahz dhuup kaa musaafir thaa ham-safar aaftaab thaa us kaa aankh jaise koi samundar ho aur lahja sharaab thaa us kaa mutmain thaa vo zaat se apni khud hi vo intikhaab thaa us kaa"

"jab ujaalaa gali se guzarne lagaa sab andheron kaa chehra utarne lagaa daur badla to main bhi badal saa gayaa be-gunaahi se apni mukarne lagaa shaam aai to teraa khayaal aa gayaa aaina mere ghar kaa sanvarne lagaa khushbuon ki tarah itr-daanon mein the jab havaa chal gai sab bikharne lagaa ik ghazal kah sakun gar ijaazat mile aansuon kaa ye jharnaa nikharne lagaa"

"kahaan aur kab kab akelaa rahaa huun main har roz har shab akelaa rahaa huun mujhe apne baare mein kyaa mashvara ho main apne liye kab akelaa rahaa huun udaasi kaa aalam yahaan tak rahaa hai main hote hue sab akelaa rahaa huun yahaan se vahaan tak idhar se udhar tak main pashchim se purab akelaa rahaa huun bahut hausla mujh ko main ne diyaa hai main rote hue jab akelaa rahaa huun tiri zaat mujh se judaa hi rahi hai main tab ho ki yaa ab akelaa rahaa huun"

"tanhaaiyon ki god mein pal kar baDaa huaa bachpan se apne aap sanbhal kar baDaa huaa ghairon ko apnaa maan ke jiitaa rahaa huun main is raah-e-pul-siraat pe chal kar baDaa huaa main ne kabhi bhi raat se shikva nahin kiyaa har shab kisi charaagh saa jal kar baDaa huaa patthar se koi vaasta matlab na thaa magar har aaine ki aankh mein khal kar baDaa huaa makhmal ki chaadaron kaa mujhe kyaa pata ki main kaanTon ke bistaron ko masal kar baDaa huaa"

"jo ghaav tum ne diyaa thaa vo ghaav zinda hai abhi hanso na miri jaan 'raav' zinda hai tumhaari dil se vahi khelne ki aadat hai hamaaraa apnaa vahi rakh-rakhaao zinda hai abhi na soch miri haar teri jiit hui abhi to khel mein antim paDaav zinda hai Dare Dare hue sahme hue andhere hain charaagh bujh to rahaa hai dabaav zinda hai hamein yaqin hai 'naasir' nahin bhaTak sakte abhi ghazal se hamaaraa lagaav zinda hai"

"kahin azaab kahin par savaab likhte hain farishte roz hamaaraa hisaab likhte hain bahut se log to aise bhi hain isi yug mein kitaab paDhte nahin hain kitaab likhte hain vo apne jism ke khaanon mein aag rakhte hain gulaab hote nahin hain gulaab likhte hain yahaan ke log to taabir jaante hi nahin ye apne niind mein rahne ko khvaab likhte hain tumhaare zulm tumhaare sitam nahin likhte ham apne aap ki qismat kharaab likhte hain"

"hamaare haq mein duaa karegaa vo ik na ik din vafaa karegaa bichhaD gayaa hai magar yaqin hai kabhi kabhi vo milaa karegaa tu apne aashiq ko saath rakh le bichhaD gayaa to nasha karegaa jo apni haalat kaa khud sabab ho vo kyaa kisi se gilaa karegaa agar ye duniyaa ujaD gai to kabhi ye sochaa hai kyaa karegaa main jaantaa huun ki ik farishta jo zindagi se rihaa karegaa abhi tu shaair nahin hai 'raav' khudaa vo din bhi ataa karegaa"

"sanjida tabiat ki kahaani nahin samjhe aankho mein rahe aur vo paani nahin samjhe ek sher huaa yuun ki kaleje se lagaa hai dariyaa mein utar kar bhi ravaani nahin samjhe kyaa khat mein likhaa jaae ki samjhaae unhein ham jo saamne rah kar bhi zabaani nahin samjhe bachpan ko luTaayaa hai javaani ke liye yaar ham log javaani ko javaani nahin samjhe pahle to kahaa 'raav' koi sher sunaao phir dost miri baat ke maani nahin samjhe"

"aankh mein aansu nahin shabnam nahin kuchh gham nahin zakhm hain jin par koi marham nahin kuchh gham nahin dard vo de kar musalsal haalat-e-dil puchhte hain ye inaayat bhi to un ki kam nahin kuchh gham nahin raat kaa pichhlaa pahar hai aur ham khaana-ba-dosh koi dar-divaar kaa maatam nahin kuchh gham nahin har taraf hain khuun se rangin kapDe aur tan ye hamaare shauq kaa aalam nahin kuchh gham nahin sab Dare sahme hue se gum hain apne aap mein har koi shaamil hai is mein ham nahin kuchh gham nahin"

"chehre pe koi rang shikaayat kaa nahin thaa lekin vo tabassum hi mohabbat kaa nahin thaa chhoDaa bhi mujhe aur bahut khush bhi rahe ho afsos ke main aap ki aadat kaa nahin thaa vaqton ke siyaah rang se zarron pe likhaa hai duniyaa mein koi daur sharaafat kaa nahin thaa ab sar ko paTakne se koi faiz nahin hai marne kaa taqaaza thaa vo hijrat kaa nahin thaa darbaar bhi thaa saahab-e-kirdaar bhi lekin adnaa saa koi jazb-e-sakhaavat kaa nahin thaa"

"kuchh ziyaada vabaal kar Daalaa phir khudaa ne zavaal kar Daalaa apnaa ilzaam mere sar Daalaa yaar tum ne kamaal kar Daalaa ek taaza gulaab chehre ko ek puraani misaal kar Daalaa meraa kaasa chaTak gayaa shaayad us ne hiiraa nikaal kar Daalaa din guzaara idhar udhar tanhaa raat aai malaal kar Daalaa phir teri yaad aa gai 'naasir' dekh aankho ko laal kar Daalaa"