Ghazal

"jaise mehmaan koi aae kisi mehmaan ke baad sher main ne bhi kahe hain nae rujhaan ke baad faisla soch ke karnaa kahin ronaa na paDe rakh ke aayaa huun main aankhein tire imaan ke baad is inaayat pe main izhaar kaun saa rang kashtiyaan le ke chale aae ho tufaan ke baad meri aankhon ke madine mein vahi hai ab tak thaa jo quraan se pahle hai jo quraan ke baad raushni baanTi yahaan main ne charaaghon ke baghair zindagi tu ne bhi dekhaa mujhe taavaan ke baad"

"junhi nigaah mein tiraa chehra utar gayaa daaman udaas raat kaa taaron se bhar gayaa us bhiiD mein savaal miri zindagi kaa thaa dastaar thaame haath mein tu bhi guzar gayaa kab khvaab-kaar-e-ishq mein tai kar sakaa koi jitni miri bisaat thi utnaa main kar gayaa us ne jalaa-bujhaa ke sataayaa hazaar baar jab bhi charaagh use miri dene khabar gayaa tark-e-taalluqaat ki baabat 'naved' aaj puchhaa jab aaine se to vo bhi mukar gayaa"

"aalam ho qahr kaa to labon par duaa na ho is khaamushi pe main bhi ye dekhun ki kyaa na ho ab to hamaare ahd mein firauniyat ke beach muusaa vahi hai haath mein jis ke asaa na ho bante hain zaabte yahaan honTon pe qufl ke patthar ye chaahte hain koi be-sadaa na ho aisaa na ho ki khvaab bhi jhaD jaaein niind se mausam yahaan ho sard pa itnaa khafaa na ho ghabraa ke sab ujaalon se kahne lage 'naved' ham tirgi mein jaaein to ik bhi diyaa na ho"

"qadmon mein jab se mere hain taare dhare hue saare adu hain ghar mein bichaare dhare hue achchhaa to Thiik hai mujhe chalnaa usi pe hai rasta ki jis pe honge khasaare dhare hue taari hai mauj mauj pe kuchh is liye bhi khauf aayaa huun raund kar main kinaare dhare hue ik jang thi hamaari jise jitne ke baad palkon pe kyuun the us ke ishaare dhare hue un se havaa pe naqsh hui naghmagi 'naved' jitne bhi the charaagh hamaare dhare hue"

"dekho kabhi tum us kaa bhi aanaa mire aage jis kaa na chale koi bahaana mire aage raste mein use duun ki nahin duun ye bataao suraj mire pichhe hai zamaana mire aage vo shakhs jise qais bataate hain sabhi log ab vaqt nahin phir kabhi laanaa mire aage achchhaa ye sitam mujh ko charaaghon kaa lagaa hai har shaam tiraa aks sajaanaa mire aage laataa hai mujhe khinch ke sahraa bhi shab-o-roz vahshat bhi piroti hai fasaana mire aage"

"jiit aur haar mein paDe hue hain log meaar mein paDe hue hain ab guzartaa hai vaqt tezi se ham bhi raftaar mein paDe hue hain ham muqayyad hain tere honTon mein aur inkaar mein paDe hue hain un charaaghon ko kaam mein laao jo bhi be-kaar mein paDe hue hain jhaaD aayaa huun apne daaman ko daagh baazaar mein paDe hue hain"

"makaan bechaa nahin main ne guzaaraa chal rahaa hai nadi apni jagah par hai kinaaraa chal rahaa hai ibaadat mein abhi mashghul hain in ko na chheDo vafaa kis se kareinge istikhaara chal rahaa hai main khud parvaaz se apni pareshaan aaj-kal huun zamaana hai zamin par aur bichaara chal rahaa hai na samjhaao mujhe yuun hiir aur raanjhe kaa chakkar vahi hai naan jo barson se hamaaraa chal rahaa hai abhi kuchh der pahle jis ko raazi kar liyaa thaa 'naved' us se miraa jhagDaa dobaara chal rahaa hai"

"honTon pe dil ki baat vo laae mire liye lekin yuun na saraab bichhaae mire liye de do ba-sad khulus sitaare unhein kai jugnu liye jo haath mein aae mire liye tum ko nahin khabar ki mahakne lagaa hai dil kaaghaz pe us ne phuul banaae mire liye main ne bhi zakhm zakhm pe hansne ki Thaan li kaanTe adu ne jab se bichhaae mire liye ye hijr bhi savaab se kam to nahin 'naved' main is ke vaaste vo kamaae mire liye"

"zindagi kyaa hai tamannaaon kaa khaaraa paani har koi pi ke yahaan maange dobaara paani ham hain vo jin ki nigaahon ne kuchal Daalaa furaat kaun hain jin ke labon par hai ye naara paani kai dariyaa miri aankhon se ravaan hone lage us ne jab khvaab mein ik baar pukaaraa paani koi sailaab umaDtaa thaa ghaDi se har din vaqt ki shakl mein ham ne to guzaaraa paani faisla us ne judaai kaa sunaayaa to lagaa jaise sahraa mein koi pyaas mein haaraa paani is liye log sulagte hi yahaan karbal mein jise miltaa hai vo pi letaa hai saaraa paani tishnagi baanT ke har qaum kaa rahbar ye kahe saari duniyaa mein to bahtaa hai hamaaraa paani aaj jazbaat hain pyaase sar-e-qirtaas 'naved' kar rahaa hai mujhe har lafz ishaara paani"

"har baat par na yuun hamein ghussa karein huzur kuchh bad-mizaaj log hain dekhaa karein huzur ik din havaa ke khauf se kahne lagaa charaagh meraa yuun shaairi mein na charchaa karein huzur jitnaa junun hai jeb mein baahar nikaaliye baazaar hai ye ishq kaa kharcha karein huzur ab siikh jaaein aap un aankhon ki bhi zabaan palkein jhukaaun jab bhi to samjhaa karein huzur itnaa hasin phuul aur us par ye barhami ham se khataa hui hai to shikva karein huzur jhagDaa huaa hai aaj sitaaron kaa chaand se bolaa hai kitni baar na chamkaa karein huzur"