Ghazal

"na ahl-e-dil se na ahl-e-nazar se miltaa hai shuur-e-zaat faqat apne dar se miltaa hai tumhaare faiz se khilte hain zindagi mein gulaab junun ko rang tumhaari nazar se miltaa hai bikhar rahi hain ziyaaein nikhar rahi hai fazaa tumhaaraa husn jamaal-e-sahar se miltaa hai farogh-e-shauq hai yaa irtiqaa-e-jazb-e-darun pataa ab apnaa tumhaari khabar se miltaa hai vahi hai haasil-e-ishrat vahi vaqaar-e-hayaat sukun-e-dil jo gham-e-mo'tabar se miltaa hai kahaan phir izn-e-safar mil gai agar manzil safar kaa zauq faqat rahguzar se miltaa hai vo kam-sukhan hain magar ham se be-niyaaz nahin suraagh-e-dil sukhan-e-mukhtasar se miltaa hai nisaar us pe do-aalam ke mai-kade 'parvez' vo ek jaam jo un ki nazar se miltaa hai"

"saaz-e-aalaam pe dil naghma-saraa hotaa hai ai mohabbat ye tire daur mein kyaa hotaa hai phail jaati hai fazaaon mein udaasi ki ghaTaa ishq jab husn se ro ro ke judaa hotaa hai hausla diid kaa hargiz na karein ahl-e-nazar jalva-e-husn bahut hosh-rubaa hotaa hai vo havas hai jo gila karti hai ranj-o-gham kaa ishq har haal mein raazi-ba-razaa hotaa hai un ke mubham se ishaaron kaa taassur tauba dil mein kyaa maarka-e-yaas-o-rajaa hotaa hai ham jo kahte hain use vaqt kaa shahkaar-e-jamil baat kuchh bhi nahin lekin vo khafaa hotaa hai ravish-e-khaas pe chaltaa huun adab mein 'parvez' mere har sher kaa andaaz nayaa hotaa hai"

"ai kaaenaat tere sahaare hamin to hain tere nazar-navaaz ishaare hamin to hain amvaaj-e-husn-o-ishq kaa irfaan hamin se hai dariyaa-e-zindagi ke kinaare hamin to hain tufaan-e-haadsaat ke khaaliq tumhin to ho tufaan jin ko paar utaare hamin to hain ham se sivaa hayaat ko samjhegaa aur kaun un ki navaazishaat ke maare hamin to hain ye aur baat hai ki tumhein ilm hi nahin varna bhare jahaan mein tumhaare hamin to hain duniyaa-e-zindagi kaa nazaara karein to kyaa duniyaa-e-zindagi ke nazaare hamin to hain 'parvez' shaairi ki haraarat hamin se hai ilm-o-adab ke shokh sharaare hamin to hain"

"pyaar ke bandhan kaaT rahe hain prem kaa rishta toD rahe hain shahr-e-mohabbat ke baashinde shahr-e-mohabbat chhoD rahe hain armaanon ke rah-vaaron ko jaanib-e-duniyaa moD rahe hain ulfat kaa dam bharne vaale ulfat kaa dil toD rahe hain itnaa ham ko ilm nahin thaa hijr ke sadme sahne honge ye qatan ehsaas nahin thaa kis se naata joD rahe hain is basti mein rahnaa basnaa apne bas ki baat nahin hai khuddaari ki farmaaish par shahr-e-mohabbat chhoD rahe hain dekhein apni sarkash tauba saath hamaaraa deti bhi hai aap to nafrat ke patthar par jaam-e-mohabbat phoD rahe hain ai 'parvez' ye duniyaa vaale tadbiron se ghaafil ho kar qismat ki dahliz pe naahaq apne sar ko phoD rahe hain"

"husn paaband-e-jafaa ho jaise ye koi khaas adaa ho jaise yuun tiri yaad hai mere dil mein kisi marghaT mein diyaa ho jaise ho gayaa suukh ke kaanTaa har phuul ye mahakne ki sazaa ho jaise meri furqat kaa gham-aagin 'aalam chhup ke tu dekh rahaa ho jaise kashtiyaan gharq hui jaati hain naakhudaa ho na khudaa ho jaise allah allah tiraa andaaz-e-khiraam har qadam mauj-e-sabaa ho jaise kitni pur-kaif hai ye zulmat-e-shab teri zulfon ki ghaTaa ho jaise tere honTon pe tabassum tauba maah-o-anjum ki ziyaa ho jaise un se kartaa huun taghaaful kaa gila 'ishq mein ye bhi ravaa ho jaise is tarah 'ishq se dil-shaad hain ham yahi har gham ki davaa ho jaise us se aati nahin ab koi sadaa saaz-e-dil TuuT gayaa ho jaise dekh kar tujh ko ye hotaa hai gumaan tu mire dukh ki davaa ho jaise un ko yuun DhunD rahaa huun 'parvez' 'ishq se husn judaa ho jaise"

"khuub thiin mai-kade ki fazaaein rah gaiin chhaT ke gham ki ghaTaaein maut imdaad ko aa chuki hai un se kah do ki vo ab na aaein shoala-e-husn se kyaa bachegaa daaman-e-dil ko ham kyaa bachaaein hashr Dhaati hai jumbish nazar ki fitna-gar hain kisi ki adaaein sochte hain ki us bevafaa ko yaad rakkhein ki ham bhuul jaaein haadsaat-e-jahaan tauba tauba uTh gaiin hain jahaan se vafaaein dil mein aabaad hai ek duniyaa aap mahrumiyon par na jaaein gosha-e-dil se 'parvez' ab tak aa rahi hain kisi ki sadaaein"

"yak-ba-yak jo kisi kaa khayaal aa gayaa ruuh be-khud hui dil ko haal aa gayaa dahr se rasm-e-mahr-o-vafaa uTh gai aadamiyyat mein kaisaa zavaal aa gayaa koi dekhe tire husn ki saahiri jis ne dekhaa tujhe us ko haal aa gayaa paD gai jab kisi ki nigaah-e-karam mere bhauon mein rang-e-kamaal aa gayaa puchhte kyaa ho 'parvez' ki daastaan un ki mahfil se ho kar niDhaal aa gayaa"

"dil mein ik dard nihaan ho to ghazal hoti hai sail-e-jazbaat ravaan ho to ghazal hoti hai gham kaa ehsaas javaan ho to ghazal hoti hai ishq maail ba fughaan ho to ghazal hoti hai un pe jab apnaa gumaan ho to nikhartaa hai shuur khud pe jab un kaa gumaan ho to ghazal hoti hai mere dil mein jo nihaan hai vo gham-e-be-paayaan teri aankhon se ayaan ho to ghazal hoti hai shab-e-furqat mein sulagte hue ashkon ke tufail zindagi shoala-ba-jaan ho to ghazal hoti hai"

"shaam-e-furqat milaa ye sahaaraa mujhe baarhaa be-kasi ne pukaaraa mujhe aa gayaa haath mein jaam-e-kaif-aafrin mil gayaa hijr-e-gham kaa kinaaraa mujhe kar gayaa be-niyaaz-e-gham-e-in-o-aan un ki dilkash nazar kaa ishaaraa mujhe inqalaab-e-mohabbat ye kyaa ho gayaa un kaa gham bhi nahin ab gavaaraa mujhe tere jalvon ko thi jab miri justuju yaad hai aaj tak vo nazaaraa mujhe laakh ho zer phir bhi gham-e-zindagi sau sahaaron kaa hai ik sahaaraa mujhe roz-afzun hai bechaargi ishq ki sujhtaa hi nahin koi chaaraa mujhe kah diyaa un se 'parvez' sab haal-e-dil khaamushi de gai hai sahaaraa mujhe"