Ghazal

"abr-e-rahmat gharon pe rahte the jab dupaTTe saron pe rahte the vo bhi parda-daron mein shaamil hain parde jin ke daron pe rahte the aaj ke taajvar hain jo kal tak vaqt ki Thokaron pe rahte the un ki kirchon se paaon zakhmi hain honT jo saagharon pe rahte the raqs karte the ham bhi lekin haan markazon mahvaron pe rahte the ham ko rahnaa paDaa vahaan 'parvin' dil jahaan khanjaron pe rahte the"

"payaam gham kaa vahi gham-gusaar dete hain tasalliyaan jo nai baar-baar dete hain kahaan kaa hosh unhein ye tiri hai rusvaai sadaaein tujh ko jo divaana-vaar dete hain vo aate aate ye kahte hain jald jaanaa hai vo jaate jaate nayaa intizaar dete hain bachaa sakeinge safinon ko khaak tufaan se vo naakhudaa ki jo himmat hi haar dete hain main jab bhi zikr karun dil ki be-qaraari kaa vo mujh ko sabr kaa dushman qaraar dete hain"

"ab vo aangan vo ghar na khaprelein peD panchhi na phuul aur belein zindagi ham tire muhaafiz hain kyon na phir apni jaan par khelein aasmaan se humaktaa rahtaa hai chaand ko laao god mein le lein apne ghar ki ghuTan hi behtar hai hijraton kaa azaab kyon jhelein vazn par hon ghazal ke sab misre piDhiyon se na utrin ye railein kyaa jaraaem kaa sadd-e-baab huaa aur aabaad ho gaiin jelein ab to sasti hai shaairi 'parvin' lagti rahti hain aae din selein"

"bas gayaa hai vo chaand par jaa kar aao milte hain us ke ghar jaa kar rukh badal kar qarib se guzraa baat ki us ne dur-tar jaa kar vahi maahaul hai vahi kohraam ham ne dekhaa nagar nagar jaa kar tum ko jaane to duun savaal ye hai aae vaapas na tum agar jaa kar vahi chehra thaa shaahkaar-e-azal bas vahin ruk gai nazar jaa kar aasmaan hai hamaare paaon tale kyon zamin se lage na sar jaa kar apne aangan ko kah rahe ho ujaaD dekh aae ho kis kaa ghar jaa kar"

"na bulaao mujhe khudaa ki taraf main usi ki huun bandagi mein lagi jis mein thi jangalon ki be-nazmi vo numaaish bhi shahr hi mein lagi raat main ne paDhi jo dhuup ki nazm be-maza un ko chaandni mein lagi jaam-e-suqraat kyaa piyaa main ne pyaas mujh ko na zindagi mein lagi aur kuchh kaam bhi karun 'parvin' tum to ho sirf shaairi mein lagi"

"ye chhoTaa saa makaan baghiyaa lagaane kaun detaa hai dar-o-divaar par sabza ugaane kaun detaa hai kabhi naazaan the ham aansu bahaane kaun detaa hai magar ai chashm-e-nam ab muskuraane kaun detaa hai miri aankhon ko ye sapne suhaane kaun detaa hai vo aaegaa dilaase dil ko jaane kaun detaa hai pata chaltaa hai kaise mere un ke chhup ke milne kaa khabar tujh ko hamaari ai zamaane kaun detaa hai nahin aanaa nahin aanaa yahi zid hai yahi zid hai vo aa to jaaein phir dekhun ki jaane kaun detaa hai tumhein dil mein basaa rakhaa hai meri saadgi dekho zamaane mein kisi ko sar chhupaane kaun detaa hai khud apne dil se kah lete hain tanhaai mein gham apnaa tumhaare saamne dukhDe sunaane kaun detaa hai"

"lo vo aansu sujhaai dene lage din mein taare dikhaai dene lage main ne shikva kiyaa thaa duniyaa kaa kyon tum apni safaai dene lage main ne virse mein haq jo maang liyaa dukh mujhe mere bhaai dene lage dard apnaa kahun vo mujh ko agar apne dil tak rasaai dene lage main ne achchhaa kahaa vafaa na rahi log mujh ko buraai dene lage"

"ghunT paani ke sondhe sondhe the jab vo miTTi ke aab-khore the aanch bhi khush-gavaar dete the kal jo vo dhime dhime chulhe the Daal se kairiyaan jo girti thiin paal mein kachche aam pakte the sar uThaa kar imaaraton ne kahaa vo koi ghar the yaa gharaunde the haae 'parvin' ye jadid flat in se achchhe to kal ke daDbe the"

"sukun ye apne saveron kaa chain rainon kaa koi hisaab nahin hai khudaa ki denon kaa makaan kachche the vaa'de the pakke dil raushan zamaana thaa vo charaaghon kaa laalTenon kaa ye sach hai gaanv ki raatein khamosh hoti hain magar vo shor guzarti hui trainon kaa gale kaa haar salibein hain sab dikhaave ki yahaan rivaaj hai ab to tilaai chainon kaa halaak hoti hai makhluq aur khudaaon par koi asar hi nahin shevanon kaa bainon kaa vahaan mushaa'ire paDhne chali ho tum 'parvin' jahaan hai zor laTaaon kaa taanseinon kaa"

"kuchh main kah baiThun khudaa-na-khvaasta maulvi saahab khudaa kaa vaasta yaad aati hai to bhar aataa hai dil zindagi ki mahfilein barkhaasta chaandi sonaa do magar hon beTiyaan zevar-e-taalim se aaraasta apni Thokar par hai khvaabon kaa safar kaun si manzil kahaan kaa raasta chaand taare dil jalaane aae hain shaam-e-gham aaraasta pairaasta"

"chaand par kyon main akeli jaati saath koi to saheli jaati aao mil-jul ke sahein hijr ki dhuup mujh se tanhaa nahin jheli jaati bolnaa mujh se na tum band karo har taraf baat hai phaili jaati ham agar aql ko darbaan karte haath se dil ki haveli jaati haae sandal ke darakhton ki ye raakh jaan khushbu ki na le li jaati ban to saktaa thaa nayaa ik kamra apne aangan ki chameli jaati pyaas jaati na agar saahil par kyon samundar mein akeli jaati chaand jhaanke jo kitchen mein 'parvin' mujh se roTi nahin beli jaati"

"chaand suraj mire ghar aate hain kyaa hasin khvaab nazar aate hain mujh se kahte hain Thahar dam le le raah mein jitne shajar aate hain dekhnaa mere takhayyul kaa kamaal nahin aate vo magar aate hain barq hansti hai nasheman pe mire abr baa-dida-e-tar aate hain dekh kar apne shikasta dil ko yaad mahlon ke khanDar aate hain hai buraa haal unhein kyaa maalum vo bhalaa kab mire ghar aate hain sach hai pathraav tabhi hotaa hai jab darakhton pe samar aate hain phone uThaaegi na 'parvin' us vaqt bachche schōl se ghar aate hain"

"chain aataa nahin un se mulaaqaat kiye bin bolein na vo main rahti nahin baat kiye bin kambakht havaaon ne ye kyaa keh diyaa un se kyon abr uDe jaate hain barsaat kiye bin mai aa gai ghar mein ye khabar shaikh na sun lein lauT aaeinge masjid se munaajaat kiye bin shaayad unhein Dar ho main shikaayaat karungi aae the gae pursish-e-haalaat kiye bin tum un se koi baat ishaaron mein na karnaa kam-fahm na maaneinge savaalaat kiye bin sultaan ko apnaa koi shahkaar na kar pesh chhoDegaa na vo tujh ko qalam haath kiye bin kyaa vaza banaate hain siyaasat ke mashaaikh aabid nazar aate hain ibaadaat kiye bin"

"dhuup khiDki se sirhaane aai chaand khvaabon ke bujhaane aai haae vo phuul se hanste chehre yaad phir un ki rulaane aai dil charaaghon ke abhi larzaan hain phir havaa hosh uDaane aai dil sulagtaa thaa shab-e-gham yunhi chaandni aur jalaane aai uTh hui subh-e-azaan ki aavaaz niind se mujh ko jagaane aai oDh li tu ne barahna tahzib sharm tujh ko na zamaane aai aur 'parvin' se hujjat kiije aap ki aql Thikaane aai"