Ghazal

"tum ho mujrim ham hain mulzim chalo nayaa insaaf karein tum bhi hamein muaafi de do ham bhi tumhein muaaf karein phir ujli kursi par baiThein mulzim kaa insaaf karein pahle munsif gangaa-jal se apni niyyat saaf karein jis ne jitne qatl kiye hain un kaa vo iqbaal kare main maqtulon se kah dungaa ab vo use muaaf karein ye bhi marham hai zakhmon kaa haakim aur jallaad sabhi dangaa-piDit har basti kaa nange pair tavaaf karein kuchh zahrile akhbaaron ne sab ko mere khilaaf kiyaa un mein himmat ho to mere rab ko mire khilaaf karein aane vaali naslon ko ye deti raheingi dars-e-vafaa nae musavvir tasviron mein meraa lahu muzaaf karein ik-duje ke aansu le lein ik-duje ko khushiyaan dein pyaar ki shama kaa ye ujaalaa aao har atraaf karein vote na bechein kyuun bechaare bas kambal ke badle mein jo sardi mein apni chamDi bistar karein lihaaf karein takht-nashinon ke qadmon par bose dene vaale ab ek nazar meri qurbaani par bhi to ausaaf karein baadal farz-shanaas nahin hai qaid hai yaa zanjiron mein shabnam ke qatre hi pyaase 'panchhi' par altaaf karein"

"subh kaanTon pe shaam kaanTon par umr guzri tamaam kaanTon par mire apne qalam ne chupke se likh diyaa meraa naam kaanTon par teri kirnein bhi raqs karti hain roz maah-e-tamaam kaanTon par rang aur bu-e-gul ke aashiq sab kaun bheje salaam kaanTon par roz shabnam se ghusl karte hain hai gulon kaa hamaam kaanTon par ibtidaa-e-hayaat phulon se aur hai ikhtitaam kaanTon par aisi masti ki titliyaan bhaunre ho gae ham-kalaam kaanTon par husn ki har adaa gulon par hai ishq kaa ehtishaam kaanTon par shaakh-e-gul par qafas hai 'panchhi' kaa aur shirin taaam kaanTon par"

"chamak chehre ki honTon ki hansi dekhi nahin jaati sitamgar se miri zinda-dili dekhi nahin jaati gulon se kah rahi hain titliyaan mat khanda-zan honaa ki ham se baaghbaan ki be-rukhi dekhi nahin jaati hamein aankhein mili hain shaairon jaisi ki ham se to kisi dushman ki kashti Dubti dekhi nahin jaati nadi khud khushk ho jaati hai donon ko milaane mein nadi se saahilon ki bebasi dekhi nahin jaati khazaana aab kaa ye aabshaarein kyon luTaati hain ki in se koi bhi sukhi nadi dekhi nahin jaati vahi bas chaand suraj se bahut naaraaz rahti hain ki jin aankhon se un ki raushni dekhi nahin jaati vo ambar hai main panchhi huun vo gul hai to main bulbul huun kahin bhi is tarah ki dosti dekhi nahin jaati"

"sitamgar ko bhi ahl-e-dard kaa ham-maajraa kar de khudaayaa dard-mandon kaa use dard-aashnaa kar de tahi-daaman vo kyon jis par tiri chashm-e-karam maulaa dar-e-altaaf vaa kar de muraad-e-dil ataa kar de vo divaana giraftaar-e-gham-e-duniyaa nahin hotaa jise teraa junun aazaad-e-fikr-e-maa-sivaa kar de bahut hi qimti tohfe ye honge ai miri qismat mire ahbaab ke ranj-o-alam mujh ko ataa kar de mohabbat hai use teri adaa se bahr-e-tufaani to ab tufaan ko kashti miri kaa ham-navaa kar de kahin mahrum rah jaae na 'panchhi' teri bakhshish se idhar bhi ehtimaam-e-baada-noshi saaqiyaa kar de"

"ham faqiri mizaaj rakhte hain apni Thokar mein taaj rakhte hain haath mein kaasa aur mire haakim sar pe sone kaa taaj rakhte hain saare duniyaa mein qaatil-o-maqtul apnaa apnaa mizaaj rakhte hain asl mein devtaa vahi hain ki jo apne vaade ki laaj rakhte hain paidaa karte hain jo masaail vo har maraz kaa ilaaj rakhte hain"

"kyaa hai is dil kaa haal mat puchho ham se naazuk savaal mat puchho jaan jaaegaa kul zamaana sab zindagi hai muhaal mat puchho shaairi aur adab ki duniyaa mein kaun hai baa-kamaal mat puchho ham ko denaa subut hai fan kaa khuun mein hai kyaa ubaal mat puchho shohratein kis tarah ki mere liye le ke aayaa ye saal mat puchho vaqt ik din badal ke rakh degaa us ki har ek chaal mat puchho paDh rahaa huun ghazal samajh lenaa hai ye kis kaa khayaal mat puchho hubb-e-yaaraan miraa khazaana hai us mein kitnaa manaal mat puchho kaise hain baal-o-par ye 'panchhi' ke kaise hain khadd-o-khaal mat puchho"

"jo raahon ke patthar the kyaa ho gae hain shivaalon mein jaa kar khudaa ho gae hain ye kaisi huaa chal rahi hai chaman mein ki shaakhon se patte judaa ho gae hain jo kal tak the qaatil vo gangaa nahaa kar sunaa hai ki ab devtaa ho gae hain vo shaakhein bahaaein na kyuun khuun ke aansu hare patte jin se judaa ho gae hain bataae hamein baaghbaan ki ye 'panchhi' nasheman se kyuun laapata ho gae hain"

"aas jis ki javaan hoti hai us ki unchi uDaan hoti hai jo qalam aabid-e-adab Thahraa us ki hi aan-baan hoti hai tiir lagtaa hai dil ke Thiik uupar jab nazar mein kamaan hoti hai rang taqdir kaa badal jaae jab vafaa mehrbaan hoti hai yaad aati hai jis ghaDi us ki vo ghaDi imtihaan hoti hai bin kahe bin sune ye dil samjhe baat jo darmiyaan hoti hai bad-nasibi sukun se soe jab savere azaan hoti hai hai buland us kaa parcham-e-qismat jis pe tu mehrbaan hoti hai vo hi chhute hain aasmaan 'panchhi' jin paron mein bhi jaan hoti hai"

"bahaarein rang laati hain chaman aabaad hotaa hai ki jab naazuk labon se husn kaa irshaad hotaa hai hasinon ki adaaon ke asar-andaaz hote hi kabhi dil shaad hotaa hai kabhi naashaad hotaa hai ijaazat jab nahin milti use naghma-saraai ki to bulbul ki khamoshi se chaman barbaad hotaa hai vo apni jaan ki baazi lagaae to lagaae kyon ki nakhra husn kaa jis ke liye jallaad hotaa hai nigaahon se paDhi jaati hai tahrir-e-rukh-e-raushan nigaahon se adaa-bini kaa fan ijaad hotaa hai adaa-e-husn bhi ik chashma-e-tahrik hai saahab use apnaa le jo bhi bas vahi shah-zaad hotaa hai usi ko karnaa hoti hai alam ki tarjumaani bhi mire honTon pe jo bhi jumla-e-fariyaad hotaa hai kisi ko bhi yaqin hotaa nahin hai apni aankhon par qafas mein jab parinde ki jagah sayyaad hotaa hai usi par naaz karti hai hamesha haath ki rekhaa ki jis ki muTThi mein bhi virsa-e-ajdaad hotaa hai hamesha sar jhukaataa hai 'jigar' saahab ki dharti par ki jaanaa jab bhi panchhi kaa muraadaabaad hotaa hai"

"sanam ke khayaalon mein yuun kho gayaa huun ki main ek patthar kaa but ho gayaa huun nahin dho sakaa daagh jo gangaa-jal bhi use apne ashkon se main dho gayaa huun bajaae shajar ugte hain sirf patthar main zarkhez dharti mein kyaa bo gayaa huun nahin aanch aaegi apni anaa par bulaayaa thaa us ne tabhi to gayaa huun karoge mujhe dafn to yuun lagegaa ki main maan ki godi mein hi so gayaa huun vaza-daari kaa paas thaa jo chaman mein main kaliyon kaa sar chumne ko gayaa huun mujhe fakhr hai 'panchhi' bazm-e-sukhan mein gayaa huun ba-surat ghazal-go gayaa huun"

"sochte kyaa hain chhalaktaa jaam le kar pijie us bevafaa kaa naam le kar aae the to haath khaali the hamaare jaa rahe hain sainkaDon ilzaam le kar ik diyaa ghar mein jalaayaa thaa use bhi le gayaa koi tumhaaraa naam le kar dhuup aa sakti thi vo aati nahin hai kaun aaegaa yahaan paighaam le kar kaaT liin darbaar ne sab ki zabaanein bulbulein khaamosh hain inaam le kar kaun si gangaa nahaayaa hai ye suraj jab bhi aayaa hai to qatl-e-aam le kar ab nahin koi zarurat ham-safar ki chal paDaa huun gardish-e-ayyaam le kar aashiyaan hotaa to hotaa lauTnaa bhi kyaa kare 'panchhi' avadh ki shaam le kar"