Ghazal

"usi kaa dard hai jis ke jigar kaa laasha hai main jaantaa huun ki baaqi to sab tamaasha hai main kyaa bataaun jo TuuTaa hai mujh pe zulm-o-sitam main kyaa likhun ki miraa dard be-tahaasha hai buni hain saazishein mausam ne dhuup se mil kar havaa ne mere har ik phuul ko kharaashaa hai amir-e-shahr main tujh ko tiri duhaai duun ki meraa tolaa bhi teri nazar mein maasha hai ujaaDte hue vo kaanptaa to hogaa 'zubair' vo khvaab haath nahin khuun se taraashaa hai"

"main kaise jhel sakungaa banaane vaale kaa dukh chhuri chhuri pe likhaa hai lagaane vaale kaa dukh ghazab ki aankh adaakaar thi magar haae tumhaari baat hansi mein uDaane vaale kaa dukh ghazal mein dard ki pahle bhi kuchh kami nahin thi aur is pe ho gayaa shaamil sunaane vaale kaa dukh tujhe to dukh hai faqat apni laa-makaani kaa qayaam kar to khulegaa Thikaane vaale kaa dukh badan ke chithDe uDte kahin havaaon mein sunaane vaale se kam thaa chhupaane vaale kaa dukh zamaane ishq ki tafhim to zaraa karnaa be-rozgaar bataae kamaane vaale kaa dukh giraane vaale ke ehsaas mein nahin 'qaisar' ye aasmaan ko zamin par uThaane vaale kaa dukh"

"vafaa ke jurm mein aksar pukaare jaate hain ham ahl-e-ishq mohabbat mein maare jaate hain hamaari laash to girti hai jang laDte hue magar jo piiTh pe barchhe utaare jaate hain amaama sajtaa hai aakhir amir-e-shahr ke sar hamaare jaise aqidat mein vaare jaate hain main rok saktaa nahin khaak ko bikharne se samundaron ki taraf chal ke dhaare jaate hain bhale ho kaar-e-mohabbat yaa kaar-e-duniyaa 'zubair' hamaare saath hamesha khasaare jaate hain"

"jhulasti dhuup mein mujh ko jalaa ke maaregaa vo meraa apnaa hai chhaanv mein laa ke maaregaa vo chaahtaa to miri khaak hi uDaa detaa ye kuza-gar ki inaayat banaa ke maaregaa use khabar hai laDaai mein haar saktaa hai so apnaa aap vo mujh mein samaa ke maaregaa is ek khauf se main jang mein shahid huaa adu kamina hai taane khudaa ke maaregaa main us ke jaal mein aaungaa dekhnaa 'qaisar' vo mujh ko dhoke se ghar mein bulaa ke maaregaa"

"kahin se aayaa tumhaaraa khayaal vaise hi ghazal kaa honaa huaa hai kamaal vaise hi hamaare husn-e-nazar kaa kamaal kuchh bhi nahin to kyaa tumhaaraa hai saaraa jamaal vaise hi tiraa visaal ki jis taur mere bas mein nahin huaa hai hijr mein jiinaa muhaal vaise hi tiraa javaab mire kaam kaa nahin hai ab ki main to bhuul chukaa huun savaal vaise hi kahaa ye kis ne ki uktaa gayaa junun se main paDaa huun dasht mein ab to niDhaal vaise hi uchhaaltaa hai jaziron ko jis tarah ai bahr miri bhi laash ko tah se uchhaal vaise hi nikaaltaa hai tu jis taur raat se suraj hamaari shab se hamein bhi nikaal vaise hi"

"nazar nazar se milaaoge maare jaaoge ziyaada bojh uThaaoge maare jaaoge koi nahin hai yahaan e'tibaar ke qaabil kisi ko raaz bataaoge maare jaaoge har ek shaakh pe chhiDkaa huaa hai zahr yahaan shajar ko haath lagaaoge maare jaaoge jo kaandhe par ho vo gardan utaar letaa hai kisi ko unchaa uThaaoge maare jaaoge har ek aaina manzar judaa banaataa hai nazar kaa bojh uThaaoge maare jaaoge dhuein mein milnaa muqaddar hai in lakiron kaa havaa mein naqsh banaaoge maare jaaoge ye nafsiyaati marizon kaa shahr hai 'qaisar' koi savaal uThaaoge maare jaaoge"

"vahi thi kal bhi pasand aur vahi hai aaj pasand alag mizaaj hai meraa alag mizaaj pasand main kyaa karun ki miri soch mukhtalif hai bahut main kyaa karun mujhe aayaa nahin samaaj pasand main apni raah nikaalungaa apni marzi se mujhe nahin hain zamaane tire rivaaj pasand ye meraa dil miri aankhein ye mere khvaab azaab uThaa ai ishq tujhe jo bhi hai khiraaj pasand mahaaz-e-ishq pe khud hi shikast maani hai 'zubair' dil pe huaa hai kisi kaa raaj pasand"

"tiri tasvir uThaai hui hai raushni khvaab mein aai hui hai main ne is dasht ko chhaanaa huaa hai main ne ye khaak uDaai hui hai dost hain saare zamaane vaale main ne dushman se banaai hui hai tujh se ummid vafaaon ki mujhe aag paani mein lagaai hui hai raaz ki baat bataaun main tumhein baat ye main ne uDaai hui hai aaj saalis main banaa huun apnaa kal baDi khud se laDaai hui hai ishq mein naam kamaayaa huaa hai main ne badnaami kamaai hui hai ye miraa apnaa takhayyul hai 'zubair' ye ghazal sab ne uThaai hui hai"

"na koi dhuul na manzil na raasta dil kaa nazar se paar kahin duur silsila dil kaa mire dimaagh ne mujh ko jagaa diyaa lekin us ek khvaab mein chehra hi rah gayaa dil kaa ye raat kaun mire saath jaagtaa rahaa hai ye raat kis se huaa hai mukaalima dil kaa har ek samt azaadaariyaan huiin 'qaisar' kiyaa jo main ne hai barpaa musaalima dil kaa"

"alag main sab se kahaani bhi hai alag sab se so mujh ko khaak uDaani bhi hai alag sab se badan se ruuh nikal kar samaa gai tujh mein miri ye naql-e-makaani bhi hai alag sab se samundaron mein nahin dasht ki taraf utraa ye meri aankhon kaa paani bhi hai alag sab se milaa hai dard-e-mohabbat bhi ik zamaane ke baad mujhe khushi ye manaani bhi hai alag sab se zaraa saa khvaab ko toDaa kharaash Daal gayaa ki aankh mein vo nishaani bhi hai alag sab se"

"mile kuchh ishq mein itnaa qaraar kam-az-kam hamaare chehron pe aae nikhaar kam-az-kam sunaai dene lage us ki dhaDkanon se sadaa kisi se itnaa to ho ham ko pyaar kam-az-kam ham apne khvaab ki taabir kuchh nikaalein kyaa ki ek lamha to ho paaedaar kam-az-kam mire chaman mein khizaan rakh chuki qadam lekin mire khayaal ko milti bahaar kam-az-kam tamaam umr ki naqadi mein dekhiye saahab do-chaar lamhe to hon khush-gavaar kam-az-kam chuni vo raahguzar jis taraf nahin jaanaa ho apne dil pe hamein ikhtiyaar kam-se-kam ham us ki yaad ko rakh kar sirhaane baiThe hain kisi tarah to kaTe intizaar kam-az-kam ik-aadh shakhs aziyyat-pasand hai lekin tumhaaraa hijr kare e'tibaar kam-az-kam"

"miri kahaani ke kirdaar saans lete hain main saans luun to mire yaar saans lete hain ham ek dasht mein dete hain zindagi ki naved hamaare siine mein aazaar saans lete hain kabhi to vaqt ki gardish thakaa bhi deti hai so thaam kar tiri divaar saans lete hain ukhaDne lagti hain saansein ulajh ke saanson se phir is ke baad lagaataar saans lete hain ye vaahime se mire dil mein be-sabab to nahin tiri khamoshi mein inkaar saans lete hain khutut phaTne lage miT gai hain tahrirein sunaai dete hain afkaar saans lete hain kahaani-kaar ne inkaar hi dikhaayaa hai tamaam lafzon mein izhaar saans lete hain jo chhu ke dekhiye to zindagi nahin milti 'zubair' kis liye be-kaar saans lete hain"