bachpan mein ham hi the yaa thaa aur koi — Abdul Ahad Saaz

bol the divaanon ke jin se hosh vaalon ne
soch ke dhundlakon mein apnaa raasta paayaa

laa se laa kaa safar thaa to phir kis liye
har kham-e-raah se jaan ulajhti rahi

nazar to aate hain kamron mein chalte-phirte magar
ye ghar ke log na jaane kahaan gae hue hain

shaaeri talab apni shaaeri ataa us ki
hausle se kam maangaa zarf se sivaa paayaa

muflisi bhuuk ko shahvat se milaa deti hai
gandumi lams mein hai zaaiqa-e-naan-e-javin

pas-manzar mein 'fēd' hue jaate hain insaani kirdaar
focus mein rafta rafta shaitaan ubhartaa aataa hai

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

daana-o-daam sambhaalaa mire sayyaad ne phir
apni gardan hai vahi ishq kaa phandaa hai vahi

us ke hone se hui hai apne hone ki khabar
koi dushman se ziyaada laaeq-e-izzat nahin

yaad ashkon mein bahaa di ham ne
aa ki har baat bhulaa di ham ne

hijr ke tapte mausam mein bhi dil un se vaabasta hai
ab tak yaad kaa pattaa pattaa Daali se paivasta hai