bahut badlaa mazaaq-e-dil khayaal-e-yaar ne lekin — Abdul Hai Aarfi

ab mire vaaste har mauj hai aaghosh-e-sukun
bahr-e-gham mein jo nahin hai koi saahil na sahi

aai khizaan ki yaad to dil sard ho gayaa
kuchh der bhi to lutf na aayaa bahaar kaa

mohabbat khud mohabbat kaa sila hai 'aarfi' lekin
koi aasaan hai kyaa be-niyaaz-e-muddaaa honaa

ek hi phuul thaa bas gul-kada-e-husn mein tu
chun liyaa aankh mein apni tire shaidaai ne

dil ko tapish-e-shauq ki ye lazzat-e-paiham
mil to gai lekin baDi mushkil se mili hai

hai 'aarfi' ab ye asar-e-tark-e-tamannaa
aane lage vo aur bhi kuchh had se sivaa yaad

jab ki pahlu se yaar uThtaa hai
dard be-ikhtiyaar uThtaa hai

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

ye vaqt kaifiyaat se bhartaa nahin kabhi
ye jaam ikhtiyaar nahin kar rahaa huun main

na dekh mujh ko mohabbat ki aankh se ai dost
miraa vajud miraa muddaaa na ho jaae

zid har ik baat par nahin achchhi
dost ki dost maan lete hain

aap ham se judaa nahin hote
aap par ikhtiyaar hai koi