Abdul Hai Aarfi

mohabbat khud mohabbat kaa sila hai 'aarfi' lekin
koi aasaan hai kyaa be-niyaaz-e-muddaaa honaa

ek hi phuul thaa bas gul-kada-e-husn mein tu
chun liyaa aankh mein apni tire shaidaai ne

dil ko tapish-e-shauq ki ye lazzat-e-paiham
mil to gai lekin baDi mushkil se mili hai

miri har aah aah-e-be-asar hai
vafur-e-yaas teri bad-gumaani

hai 'aarfi' ab ye asar-e-tark-e-tamannaa
aane lage vo aur bhi kuchh had se sivaa yaad

zaraa ai josh-e-gham rahne de qaabu mein zabaan meri
vo sunnaa chaahte hain khud mujhi se daastaan meri

jitni tavaqquaat thiin sab khatm ho chukin
main 'aarfi' kisi se bhi ab sargiraan nahin

toDnaa tauba kaa sau baar bhi aasaan thaa magar
jaam-e-mai mujh se to ik baar bhi toDaa na gayaa

sukun-e-iztiraab-e-gham pe chaara-saaz to khush hain
dil-e-betaab ki lekin qazaa maalum hoti hai

ab mire vaaste har mauj hai aaghosh-e-sukun
bahr-e-gham mein jo nahin hai koi saahil na sahi

bahut badlaa mazaaq-e-dil khayaal-e-yaar ne lekin
jo shaayaan-e-mazaaq-e-yaar thaa aisaa kahaan badlaa

aai khizaan ki yaad to dil sard ho gayaa
kuchh der bhi to lutf na aayaa bahaar kaa