hai 'aarfi' ab ye asar-e-tark-e-tamannaa — Abdul Hai Aarfi

mohabbat khud mohabbat kaa sila hai 'aarfi' lekin
koi aasaan hai kyaa be-niyaaz-e-muddaaa honaa

ek hi phuul thaa bas gul-kada-e-husn mein tu
chun liyaa aankh mein apni tire shaidaai ne

dil ko tapish-e-shauq ki ye lazzat-e-paiham
mil to gai lekin baDi mushkil se mili hai

zaraa ai josh-e-gham rahne de qaabu mein zabaan meri
vo sunnaa chaahte hain khud mujhi se daastaan meri

jitni tavaqquaat thiin sab khatm ho chukin
main 'aarfi' kisi se bhi ab sargiraan nahin

toDnaa tauba kaa sau baar bhi aasaan thaa magar
jaam-e-mai mujh se to ik baar bhi toDaa na gayaa

mere khvaabon ke jharokon ko sajaate rahiye
na sahi vasl magar yaad to aate rahiye

yunhi dil ne chaahaa thaa ronaa-rulaanaa
tiri yaad to ban gai ik bahaanaa

ye ilm kaa saudaa ye risaale ye kitaabein
ik shakhs ki yaadon ko bhulaane ke liye hain

aataa rahaa huun yaad main us ko tamaam umr
is zaaviye se ishq mein naakaam kab huaa

vo jo ham mein tum mein qaraar thaa tumhein yaad ho ki na yaad ho
vahi yaani vaada nibaah kaa tumhein yaad ho ki na yaad ho

usi ki tarah mujhe saaraa zamaanaa chaahe
vo miraa hone se zyaada mujhe paanaa chaahe