jitni tavaqquaat thiin sab khatm ho chukin — Abdul Hai Aarfi

ab mire vaaste har mauj hai aaghosh-e-sukun
bahr-e-gham mein jo nahin hai koi saahil na sahi

bahut badlaa mazaaq-e-dil khayaal-e-yaar ne lekin
jo shaayaan-e-mazaaq-e-yaar thaa aisaa kahaan badlaa

aai khizaan ki yaad to dil sard ho gayaa
kuchh der bhi to lutf na aayaa bahaar kaa

mohabbat khud mohabbat kaa sila hai 'aarfi' lekin
koi aasaan hai kyaa be-niyaaz-e-muddaaa honaa

ek hi phuul thaa bas gul-kada-e-husn mein tu
chun liyaa aankh mein apni tire shaidaai ne

dil ko tapish-e-shauq ki ye lazzat-e-paiham
mil to gai lekin baDi mushkil se mili hai

gham hai na ab khushi hai na ummid hai na yaas
sab se najaat paae zamaane guzar gae

uThaa hi laayaa sabhi raaste vo kaandhon par
yaqin us pe na kartaa to main kidhar jaataa

nahin nahin main bahut khush rahaa huun tere baghair
yaqin kar ki ye haalat abhi abhi hui hai

ishq mein qadr-e-khastagi ki ummid
ai 'jigar' hosh ki davaa kijiye

isi ummid par to kaaT liin ye mushkilein ham ne
ab is ke baa'd to ai 'shaad' aasaani mein rahnaa hai

is Dubte suraj se to ummid hi kyaa thi
hans hans ke sitaaron ne bhi dil toD diyaa hai