muddaaa duur tak gayaa lekin — Abdul Hamid Adam

saaqi mujhe sharaab ki tohmat nahin pasand
mujh ko tiri nigaah kaa ilzaam chaahiye

ijaazat ho to main tasdiq kar luun teri zulfon se
sunaa hai zindagi ik khub-surat daam hai saaqi

savaal kar ke main khud hi bahut pashemaan huun
javaab de ke mujhe aur sharmsaar na kar

marne vaale to khair hain bebas
jiine vaale kamaal karte hain

mai-kada hai yahaan sukun se baiTh
koi aafat idhar nahin aati

ai gham-e-zindagi na ho naaraaz
mujh ko aadat hai muskuraane ki

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

tira-o-taar fazaaon mein jiyaa huun ab tak
nikhat-o-nur ke ayyaam ki hasrat hi rahi

siyaah raat ke pahlu mein jism ke andar
kisi gunaah ki khvaahish ko paalte rahnaa

zindagi bhar mujhe is baat ki hasrat hi rahi
din guzaarun to koi raat suhaani aae

khvaahish hai ki khud ko bhi kabhi duur se dekhun
manzar kaa nazaara karun manzar se nikal kar

khvaab aur tamannaa kaa kyaa hisaab rakhnaa hai
khvaahishein hain sadiyon ki umr to zaraa si hai