chamak de chaand ko ThanDak havaa ko dil ko umang — Abdullah Kamal

vo qayaamat thi ki reza reza ho ke uD gayaa
ai zamin varna kabhi ik aasmaan meraa bhi thaa

aao aaj ham donon apnaa apnaa ghar chun lein
tum navaah-e-dil le lo khitta-e-badan meraa

ik musalsal jang thi khud se ki ham zinda hain aaj
zindagi ham teraa haq yuun bhi adaa karte rahe

apne vajud se pare ab
koi bhi raasta nahin hai

bas ik khaana-badoshi hai ki ab tak saath hai apne
taayyush hai tasavvur mein bhi ab koi makaan rakhnaa

tum to ai khushbu havaao us se mil kar aa gaiin
ek ham the zakhm-e-tanhaai haraa karte rahe

ye aansu ponchh lijiye aur muskuraaiye
chaara nahin hai koi bhi rukhsat kiye baghair

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

main ne apni palkon par gham-kade sajaae hain
aarzu ke maatam mein sogvaar hasti hai

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

husn jalva dikhaa gayaa apnaa
ishq baiThaa rahaa udaas kahin