sab yaar sochte the rahegaa vahi samaan — Amaan Ali Khan

khush-nasibi hai tumhaari sar pe hai jo maan kaa haath
ham yatimon ko pata hai ye du'aa kyaa chiiz hai

shab-e-gham ki yuun bhi main kartaa huun 'izzat
ye shab 'umr mein mujh se kaafi baDi hai

kuchh der to Dare tiri jaadugari se ham
phir dekhne lage tujhe sanjidgi se ham

us ne rakkhaa thaa haath saahil par
tab se dariyaa mein bhi sharaare hain

main ne dafnaae vaaldain apne
mujh se puchho ki hausla kyaa hai

saath jab chhoD gae meraa tum ai kuza-gar
khud ko majburi mein phir khud hi taraashaa main ne

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

sochtaa huun ki tujh ko mujh se koi
haadisa hi bachaa ke le jaae

dekhtaa huun tu nahin rahm ke qaabil koi
sochtaa huun to hazaaron taras aataa hai

vaqt badlaa soch badli baat badli
ham se bachche kah rahe hain ham nae hain

itnaa soch lo sach ki raah pe chalne se pahle
is ke to har ek qadam par khaDDaa hotaa hai