dil-e-fasurda pe sau baar taazgi aai — Arsh Malsiyani

jitni vo mire haal pe karte hain jafaaein
aataa hai mujhe un ki mohabbat kaa yaqin aur

ishq-e-butaan kaa le ke sahaaraa kabhi kabhi
apne khudaa ko ham ne pukaaraa kabhi kabhi

mohabbat soz bhi hai saaz bhi hai
khamoshi bhi hai ye aavaaz bhi hai

maut hi insaan ki dushman nahin
zindagi bhi jaan le kar jaaegi

ik raushni si dil mein thi vo bhi nahin rahi
vo kyaa gae charaagh-e-tamannaa bujhaa gae

saaqi miri khamosh-mizaaji ki laaj rakh
iqraar gar nahin hai to inkaar bhi nahin

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

junun-e-mohabbat yahaan tak to pahunchaa
ki tark-e-mohabbat kiyaa chaahtaa huun

sunte the mohabbat aasaan hai vallaah bahut aasaan hai magar
is sahal mein jo dushvaari hai vo mushkil si mushkil mein nahin

ban jaaun na begaana-e-aadaab-e-mohabbat
itnaa na qarib aao munaasib to yahi hai