ek pardaa hai sirf saanson kaa — Aslam Rashid

kuchh sazaa aur baDh gai is par
zakhm khaae to muskuraae kyon

mujh se baahar nikal rahe the sab
main bhi hairaan saa nikal aayaa

din din bhar aaina dekhaa jaataa hai
tab jaa kar do chaar ishaare bante hain

aap kaa to shauq hai jalte gharon ko dekhnaa
aap aankhein nam kareinge aap rahne dijiye

qabr par phuul rakhne aayaa thaa
phir yahin ghar banaa liyaa main ne

hansi un ke labon tak aa gai hai
mukammal ho gayaa ronaa hamaaraa

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

dariyaa mein Dubo deinge sabhi shikve gile ham
saahil pe mulaaqaat mulaaqaat rahegi

kidhar Dubo ke kahaan par ubhaartaa hai tu
ye kaisaa rang hai dariyaa tiri ravaani kaa

jin ko qudarat hai takhayyul par unhein dikhtaa nahin
jin ki aanhkein Thiik hain un ko takhayyul chaahiye

hamein ranjish nahin dariyaa se koi
salaamat gar rahe sahraa hamaaraa

jaane kab tufaan bane aur rastaa rastaa bichh jaae
band banaa kar so mat jaanaa dariyaa aakhir dariyaa hai