mere andar ek dastak si kahin hoti rahi — Aziz Bano Darab Wafa

ahmiyat kaa mujhe apni bhi to andaaza hai
tum gae vaqt ki maanind ganvaa do mujh ko

main ne ye soch ke boe nahin khvaabon ke darakht
kaun jangal mein uge peD ko paani degaa

ek muddat se khayaalon mein basaa hai jo shakhs
ghaur karte hain to us kaa koi chehra bhi nahin

ham aise surmaa hain laD ke jab haalaat se palTe
to baDh ke zindagi ne pesh kiin baisaakhiyaan ham ko

main jab bhi us ki udaasi se uub jaaungi
to yuun hansegaa ki mujh ko udaas kar degaa

aaj kam-az-kam khvaabon hi mein mil ke pi lete hain, kal
shaayad khvaabon mein bhi khaali paimaane Takraaein log

kam-umri mein sunet hain
mar jaate hain achchhe log

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

bahut milaa na milaa zindagi se gham kyaa hai
mataa-e-dard baham hai to besh-o-kam kyaa hai

jo zahr pi chukaa huun tumhin ne mujhe diyaa
ab tum to zindagi ki duaaein mujhe na do

kahte hain umr-e-rafta kabhi lauTti nahin
jaa mai-kade se meri javaani uThaa ke laa