bachpan kitnaa pyaaraa thaa jab dil ko yaqin aa jaataa thaa — Azra Naqvi

uljhe uljhe resham ki Dor se bandhe rishte
har ghaDi mohabbat kaa imtihaan rahne do

phailte hue shahro apni vahshatein roko
mere ghar ke aangan par aasmaan rahne do

ab ki baar jo ghar jaanaa to saare album le aanaa
vaqt ki dimak lag jaati hai yaadon ki almaari mein

aane vaale kal ki khaatir har har pal qurbaan kiyaa
haal ko dafnaa dete hain ham jiine ki tayyaari mein

haqiqatein to mire roz o shab ki saathi hain
main roz o shab ki haqiqat badalnaa chaahti huun

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

sabhi se jab mohabbat chaahte ho
mohabbat kyon nahin karte sabhi se

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

nahin vo sham-e-mohabbat rahi to phir 'aasim'
ye kis duaa se mire ghar mein raushni si hai

sau fasaad ek ishq mein uTThe
boyaa ik tukhm uge hazaar darakht