is intizaar mein baiThe hain un ki mahfil mein — Divakar Rahi

ain-fitrat hai ki jis shaakh pe phal aaeinge
inkisaari se vahi shaakh lachak jaaegi

bahut aasaan hai do ghunT pi lenaa to ai 'raahi'
baDi mushkil se aate hain magar aadaab-e-mai-khaana

sochne ki ye baat hai 'raahi'
sochte hi rahe to kyaa hogaa

ab to utni bhi mayassar nahin mai-khaane mein
jitni ham chhoD diyaa karte the paimaane mein

vaqt barbaad karne vaalon ko
vaqt barbaad kar ke chhoDegaa

abas ilzaam mat do mushkilaat-e-raah ko 'raahi'
tumhaare hi iraade mein kami maalum hoti hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

barseingi aaj rahmatein aamad hai yaar ki
naayaab hain ye ghaDiyaan tire intizaar ki

bikhar rahi thi havaaon mein eatibaar ki raakh
aur intizaar ki muTThi mein zindagi kam thi

mustaqil ik be-yaqini ik musalsal intizaar
phir achaanak ek chehra jaa-ba-jaa raushan huaa

saraa-e-ishq mein baiThe hue hain dil vaale
aur ek aakhiri tohmat ke intizaar mein hain