ishq mein dard se hai hurmat-e-dil — Gulam Yahya Huzur Azimabadi

kahun ki shaikh-e-zamaana huun laaf to ye hai
main apne but kaa barahman huun saaf to ye hai

shab-e-hijr mein ek din dekhnaa
agar zindagi hai to mar jaaeinge

kabhi haath bhi aaegaa yaar sach kah
yaa yunhi tu baatein banaataa rahegaa

na tu jaldi kar ai dast-e-junun naaseh ko siine de
bahaar aa pahunchi ab koi Thaharte hain rafu is ke

hai afsos ai umr jaane kaa tere
ki tu mere paas ek muddat rahi hai

yaar gar puchhe to kiije kuchh arz
baat par baat kahi jaati hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

ye aansu ponchh lijiye aur muskuraaiye
chaara nahin hai koi bhi rukhsat kiye baghair

husn jalva dikhaa gayaa apnaa
ishq baiThaa rahaa udaas kahin

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

main ne apni palkon par gham-kade sajaae hain
aarzu ke maatam mein sogvaar hasti hai