tulu hogaa abhi koi aaftaab zarur — Hazin Ludhianvi

utar ke niche kabhi mere saath bhi to chalo
buland khiDkiyon se kab talak pukaaroge

tundi-e-sail-e-vaqt mein ye bhi hai koi zindagi
subh hui to ji uThe, raat hui to mar gae

aao mil baiTh kar hansein bolein
nahin maalum kab judaa ho jaaein

nazar na aai kabhi phir vo gaanv ki gori
agarche mil gae dehaat aa ke shahron se

jo paa liyaa tujhe main khud ko DhunDne niklaa
tumhaare qurb ne bhi zakhm-e-naa-rasaai diyaa

chuDiyaan kyuun utaar diin tum ne
subhein kitni udaas rahti hain

ab hai duaa ye apni har shaam har sahar ko
yaa vo badan se lipTe yaa jaan tan se nikle

uD chalaa vo ik judaa khaaka liye sar mein akelaa
subh kaa pahlaa parinda aasmaan bhar mein akelaa

shaam ko subh se taabir karo tum lekin
aankh vaale to sahar hi ko sahar jaante hain

kyaa khabar thi subh ho jaaegi tere nuur se
shaam se meraa charaagh-e-khaana rukhsat maangtaa

shafaq kaa rang sukun hai sahar ke chehre par
ki gesu-e-shab-e-gham be-qaraar hai ab tak