duur tak jaagtaa hai sannaaTaa — Husna Sarwar

shahr-dar-shahr bhaTakte hi rahe umr tamaam
kyaa tire haath ki rekhaaon mein aaraam nahin

jaagi kirnein to sabze par jhilmil aansu bol uThe
raat ko tanhaai mein shabnam chupke chupke roi hai

dil ke aangan mein andheraa hai bahut
chaand ban kar utar aao to sahi

baiThe baiThe yuun hi tanhaai ke sahraaon mein
dard ki ret pe likhte hain tiraa naam aksar

jhiil mein chaandni kaa aks-e-jamil
yaa tiri yaad dil se guzri hai

main apni zaat mein gum be-khudi mein rahti huun
sabaa ki tarah koi chheDe gudgudaae mujhe

jhaankte raat ke garebaan se
ham ne sau aaftaab dekhe hain

shor din ko nahin sone detaa
shab ko sannaaTaa jagaa detaa hai

raushni ho rahi hai kuchh mahsus
kyaa shab aakhir tamaam ko pahunchi

shab ko aa kar vo phir gayaa haihaat
kyaa isi raat ham ko sonaa thaa

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

shikva-e-zulmat-e-shab se to kahin behtar thaa
apne hisse ki koi shama jalaate jaate