baiThe baiThe yuun hi tanhaai ke sahraaon mein — Husna Sarwar

shahr-dar-shahr bhaTakte hi rahe umr tamaam
kyaa tire haath ki rekhaaon mein aaraam nahin

jaagi kirnein to sabze par jhilmil aansu bol uThe
raat ko tanhaai mein shabnam chupke chupke roi hai

dil ke aangan mein andheraa hai bahut
chaand ban kar utar aao to sahi

jhiil mein chaandni kaa aks-e-jamil
yaa tiri yaad dil se guzri hai

main apni zaat mein gum be-khudi mein rahti huun
sabaa ki tarah koi chheDe gudgudaae mujhe

tiri nigaah mein ye jo kiran si kaanpti hai
dayaar-e-dil mein ye kaisaa charaagh jaltaa hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

ye aansu ponchh lijiye aur muskuraaiye
chaara nahin hai koi bhi rukhsat kiye baghair

husn jalva dikhaa gayaa apnaa
ishq baiThaa rahaa udaas kahin

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

main ne apni palkon par gham-kade sajaae hain
aarzu ke maatam mein sogvaar hasti hai