na jaane kitne charaaghon ko mil gai shohrat — Iqbal Ashhar

vo kisi ko yaad kar ke muskuraayaa thaa udhar
aur main naadaan ye samjhaa ki vo meraa huaa

aaj phir niind ko aankhon se bichhaDte dekhaa
aaj phir yaad koi choT puraani aai

muddaton baa'd mayassar huaa maan kaa aanchal
muddaton baa'd hamein niind suhaani aai

'azim log the TuuTe to ik vaqaar ke saath
kisi se kuchh na kahaa bas udaas rahne lage

le gaiin duur bahut duur havaaein jis ko
vahi baadal thaa miri pyaas bujhaane vaalaa

suno samundar ki shokh lahro havaaein Thahri hain tum bhi Thahro
vo duur saahil pe ek bachcha abhi gharaunde banaa rahaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

ba-zaahir dasht ki jaanib to baDhtaa jaa rahaa hai
magar sab raaste bhi yaad kartaa jaa rahaa hai

ye jo zindagi ki kitaab hai ye kitaab bhi kyaa kitaab hai
kahin ik hasin saa khvaab hai kahin jaan-levaa azaab hai