main aise husn-e-zan ko khudaa maantaa nahin — Iqbal Kaifi

guhar samjhaa thaa lekin sang niklaa
kisi kaa zarf kitnaa tang niklaa

dekhaa hai mohabbat ko ibaadat ki nazar se
nafrat ke avaamil hamein maayub rahe hain

amn 'kaifi' ho nahin saktaa kabhi
jab talak zulm-o-sitam maujud hai

khizaan kaa daur bhi aataa hai ek din 'kaifi'
sadaa-bahaar kahaan tak darakht rahte hain

phulon kaa tabassum bhi vo pahlaa saa nahin hai
gulshan mein bhi chalti hai havaa aur tarah ki

mohabbaton ko bhi us ne khataa qaraar diyaa
magar ye jurm hamein baar baar karnaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi