mohabbaton ko bhi us ne khataa qaraar diyaa — Iqbal Kaifi

guhar samjhaa thaa lekin sang niklaa
kisi kaa zarf kitnaa tang niklaa

dekhaa hai mohabbat ko ibaadat ki nazar se
nafrat ke avaamil hamein maayub rahe hain

amn 'kaifi' ho nahin saktaa kabhi
jab talak zulm-o-sitam maujud hai

khizaan kaa daur bhi aataa hai ek din 'kaifi'
sadaa-bahaar kahaan tak darakht rahte hain

phulon kaa tabassum bhi vo pahlaa saa nahin hai
gulshan mein bhi chalti hai havaa aur tarah ki

main aise husn-e-zan ko khudaa maantaa nahin
aahon ke ehtijaaj se jo maavaraa rahe

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

mohabbat phuul banne par lagi thi
palaT kar phir kali kar li hai main ne

kuchh aur vus'atein darkaar hain mohabbat ko
visaal-o-hijr pe daar-o-madaar mushkil hai

tazkira soz-e-mohabbat kaa kiyaa thaa ik baar
taa-dam-e-marg zabaan se miri chhaale na gae

ghussa aataa hai pyaar aataa hai
ghair ke ghar se yaar aataa hai