phulon kaa tabassum bhi vo pahlaa saa nahin hai — Iqbal Kaifi

guhar samjhaa thaa lekin sang niklaa
kisi kaa zarf kitnaa tang niklaa

dekhaa hai mohabbat ko ibaadat ki nazar se
nafrat ke avaamil hamein maayub rahe hain

amn 'kaifi' ho nahin saktaa kabhi
jab talak zulm-o-sitam maujud hai

khizaan kaa daur bhi aataa hai ek din 'kaifi'
sadaa-bahaar kahaan tak darakht rahte hain

mohabbaton ko bhi us ne khataa qaraar diyaa
magar ye jurm hamein baar baar karnaa hai

main aise husn-e-zan ko khudaa maantaa nahin
aahon ke ehtijaaj se jo maavaraa rahe

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kahaan milegi misaal meri sitamgari ki
ki main gulaabon ke zakhm kaanTon se si rahaa huun

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

gul kiyaa jis ne vo thaa aur magar
shama ne shikva havaaon se kiyaa

abr-e-bahaar baad-e-sabaa apni raah lein
majnun ko kaaenaat kisi kaam ki nahin

gulchin bahaar-e-gul mein na kar man-e-sair-e-baagh
kyaa ham ghubaar daaman-e-baad-e-sabaa ke hain