uTThi thi pahli baar jidhar chashm-e-aarzu — Jafar Tahir

arsa-e-zulmat-e-hayaat kaTe
ham-nafas muskuraa ki raat kaTe

tujhe bhi dekh liyaa ham ne o khudaa-e-ajal
ki teraa zor chalaa bhi to ahl-e-gham pe chalaa

jab bhi dekhi hai kisi chehre pe ik taaza bahaar
dekh kar main tiri tasvir puraani royaa

ai vatan jab bhi sar-e-dasht koi phuul khilaa
dekh kar tere shahidon ki nishaani royaa

aapas ki guftugu mein bhi kaTne lagi zabaan
ab doston se tark-e-mulaaqaat chaahiye

ik umr bhaTakte hue guzri hai junun mein
ab kaun fareb-e-nigah-e-yaar mein aae

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

jaada-e-gham mein aarzu ke sivaa
ham-safar dusraa nahin hotaa

zindagi ki hansi uDaati hui
khvaahish-e-marg sar uThaati hui

kuchh is liye bhi tiri aarzu nahin hai mujhe
main chaahtaa huun miraa ishq jaavedaani ho

ab ye khvaahish hai karein log hamaari ghibat
phail jaaein tiri galiyon mein khabar ki surat

bas ek pal ki tamannaa-e-vasl ki khaatir
tamaam 'umr lagaa di gai sanvarne mein