jahaan hasin hai mohabbat ki dil-navaazi se — JaiKrishn Chaudhry Habeeb

bichhDe mujh se is tarah vo zindagi ke ham-safar
bujh gae hon jalte jalte jaise raste ke charaagh

'habib' khud hi banaaeinge roz-o-shab apne
huaa hi kyaa jo zamaane ne saath chhoD diyaa

har ik fasurda qalb pe chhaai shaguftagi
jab chhiD gai hai bazm mein us gul-badan ki baat

baDhti gaiin jafaaein jahaan raah-e-shauq mein
josh-e-junun baDhaataa gayaa tez-tar mujhe

paa ke ik teraa tabassum muskuraai kaaenaat
jhuum uTThaa vo bhi dil jiine se jo bezaar thaa

nikhat vahi surur vahi dil-kashi vahi
aamad ye aap ki hai ki jhonkaa bahaar kaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ji chaahtaa hai aaj 'adam' un ko chheDiye
Dar Dar ke pyaar karne mein koi mazaa nahin

rone lagtaa huun mohabbat mein to kahtaa hai koi
kyaa tire ashkon se ye jangal haraa ho jaaegaa

jahaan-e-ishq se ham sarsari nahin guzre
ye vo jahaan hai jahaan sarsari nahin koi shai

ye vo mausam hai jis mein koi pattaa bhi nahin hiltaa
dil-e-tanhaa uThaataa hai saubat shaam-e-hijraan ki