insaan ki khvaahishon ki koi intihaa nahin — Kaifi Azmi

peD ke kaaTne vaalon ko ye maalum to thaa
jism jal jaaeinge jab sar pe na saaya hogaa

gar Dubnaa hi apnaa muqaddar hai to suno
Dubeinge ham zarur magar naakhudaa ke saath

ghurbat ki ThanDi chhaanv mein yaad aai us ki dhuup
qadr-e-vatan hui hamein tark-e-vatan ke baad

ik khvaab khushi kaa dekhaa nahin dekhaa jo kabhi to bhuul gae
maangaa huaa tum kuchh de na sake jo tum ne diyaa vo sahne do

divaarein to har taraf khaDi hain
kyaa ho gae mehrbaan saae

dil ki naazuk ragein TuTti hain
yaad itnaa bhi koi na aae

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

mujhe bhi yuun to baDi aarzu hai jiine ki
magar savaal ye hai kis tarah jiyaa jaae

aarzu ik 'ishq ki laai 'adam se dahr tak
kaifiyat ye paane ko piitaa hai aadam zahr tak

rukh pe aa jaataa hai jis roz tamanna kaa bukhaar
raat ho jaati hai chehra mujhe dhote dhote

kahin daam-e-sabza-e-gul milaa kahin aarzu kaa chaman khilaa
tire husn ko ye khabar bhi hai main kahaan kahaan se guzar gayaa