vahi to umr mere dard-e-dil ki bhi hogi — Kaleem Aajiz

gham hai to koi lutf nahin bistar-e-gul par
ji khush hai to kaanTon pe bhi aaraam bahut hai

ye tarz-e-khaas hai koi kahaan se laaegaa
jo ham kaheinge kisi se kahaa na jaaegaa

mausam-e-gul hamein jab yaad aayaa
jitnaa gham bhule the sab yaad aayaa

haan kuchh bhi to derina mohabbat kaa bharam rakh
dil se na aa duniyaa ko dikhaane ke liye aa

unhin ke giit zamaane mein gaae jaaeinge
jo choT khaaeinge aur muskuraae jaaeinge

ye aansu be-sabab jaari nahin hai
mujhe rone ki bimaari nahin hai

ye aansu ponchh lijiye aur muskuraaiye
chaara nahin hai koi bhi rukhsat kiye baghair

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

main ne apni palkon par gham-kade sajaae hain
aarzu ke maatam mein sogvaar hasti hai

ham haal to kah sakte hain apnaa pa kahein kyaa
jab vo idhar aate hain to tanhaa nahin aate