aab-e-haivaan ko mai se kyaa nisbat — Kashfi Multani

naachti hai jab tu apne dilrubaa andaaz se
aafrin ke naghme uThte hain dilon ke saaz se

thak thak ke tiri raah mein yuun baiTh gayaa huun
goyaa ki bas ab mujh se safar ho nahin saktaa

zamaana aayaa kuchh aisaa ki ab to har ghar mein
laTak rahi hai masarrat nazir ki tasvir

ik 'muzaffar'-gaDhi ke haathon se kaar-naama huaa hai laa-saani
jis ki takhliq naghma-e-sahraa naam 'kashfi' ba-urf 'multaani'

teri aankhein hain ki aahu-e-khutan ki aankhein
mahv-e-hairat thiin javaanaan-e-chaman ki aankhein

'kashfi' ko koi puchhne aae to dosto
kahnaa ki chand sher sunaa kar chale gae

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

uD gae sab chaman ko rah gae ham
chaar tinkon kaa aashiyaan le kar

dukhtar-e-raz ne diye chhinTe kuchh aise saaqiyaa
paani paani ho gai tauba har ik mai-khvaar ki

main bachpan mein khilaune toDtaa thaa
mire anjaam ki vo ibtidaa thi

hamaare she'r naghme aur sajde
adaa jo ho na paae kyaa hue vo