teri aankhein hain ki aahu-e-khutan ki aankhein — Kashfi Multani

naachti hai jab tu apne dilrubaa andaaz se
aafrin ke naghme uThte hain dilon ke saaz se

thak thak ke tiri raah mein yuun baiTh gayaa huun
goyaa ki bas ab mujh se safar ho nahin saktaa

aab-e-haivaan ko mai se kyaa nisbat
paani paani hai aur sharaab sharaab

zamaana aayaa kuchh aisaa ki ab to har ghar mein
laTak rahi hai masarrat nazir ki tasvir

ik 'muzaffar'-gaDhi ke haathon se kaar-naama huaa hai laa-saani
jis ki takhliq naghma-e-sahraa naam 'kashfi' ba-urf 'multaani'

'kashfi' ko koi puchhne aae to dosto
kahnaa ki chand sher sunaa kar chale gae

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

be-khudi mein jise ham samjhe hain teraa daaman
ain mumkin hai ki apnaa hi garebaan nikle

ye aur baat ki aandhi hamaare bas mein nahin
magar charaagh jalaanaa to ikhtiyaar mein hai

ye maskharon ko vazife yunhi nahin milte
raiis khud nahin hanste hansaanaa paDtaa hai