tanur-e-vaqt ki hiddat se Dar gae ham bhi — Kausar Siwani

jo toD doge mujhe tum bhi TuuT jaaoge
ki irtibaat-e-salaasil ki ik kaDi huun main

hamein jo fikr ki daavat na de sake 'kausar'
vo sher sher to hai ruh-e-shaaeri to nahin

kyaa dil ki pyaas thi ki bujhaai na jaa saki
baadal nichoD ke na samundar taraash ke

samundar ki tarah vusat ho jis mein
vo qatra bahr hai qatra nahin hai

zindagi kuchh to bharam rakh le vafaadaari kaa
tujh ko mar mar ke shab-o-roz sanvaaraa hai bahut

main to qaabil na thaa un ke didaar ke
un ki chaukhaT pe meri khataa le gai

leaderi chaaho to lafz-e-qaum hai mehmaan-navaaz
gap-navison ko aur ahl-e-mez ko raazi karo

donon ke dil mein khauf thaa maidaan-e-jang mein
donon kaa khauf faasla thaa darmiyaan kaa

javaab aae na aae shikan to aaegi
savaal puchh hi lenaa agarche Darte hue

abhi kitni sazaaein aur degaa
na mar jaaun kahin main tere Dar se

khauf-e-mahshar na rahaa dil mein jo dekhaa main ne
pusht par mere gunaahon ke hai rahmat us ki

jiine vaale qazaa se Darte hain
zahr pi kar davaa se Darte hain