duniyaa se duur apne baraabar khaDe rahe — KHalid Malik Sahil

ham log to akhlaaq bhi rakh aae hain 'saahil'
raddi ke isi Dher mein aadaab paDe the

guzar rahi hai jo dil par vahi haqiqat hai
gham-e-jahaan kaa fasaana gham-e-hayaat se puchh

khvaab dekhaa thaa mohabbat kaa mohabbat ki qasam
phir isi khvaab ki taabir mein masruf thaa main

bas ek khauf thaa zinda tiri judaai kaa
miraa vo aakhiri dushman bhi aaj maaraa gayaa

tum maslahat kaho yaa munaafiq kaho mujhe
dil mein magar ghubaar bahut der tak rahaa

main tamaashaa huun tamaashaai hain chaaron jaanib
sharm hai sharm ke maare nahin ro saktaa main

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

biis baras se ik taare par man ki jot jagaataa huun
divaali ki raat ko tu bhi koi diyaa jalaayaa kar

rok do ye raushni ki tez dhaar
meri miTTi mein gundhi hai raat bhi

vasl ki raat ke sivaa koi shaam
saath le kar sahar nahin aati