phuul rote hain khaar hanste hain — Mahesh Chandra Naqsh

bahut dushvaar thi raah-e-mohabbat
hamaaraa saath dete ham-safar kyaa

haal kah dete hain naazuk se ishaare akasr
kitni khaamosh nigaahon ki zabaan hoti hai

khud-shanaasi thi justuju teri
tujh ko DhunDaa to aap ko paayaa

un ke gesu sanvarte jaate hain
haadse hain guzarte jaate hain

shaam-e-hijraan bhi ik qayaamat thi
aap aae to mujh ko yaad aayaa

kaun samjhe ham pe kyaa guzri hai 'naqsh'
dil laraz uThtaa hai zikr-e-shaam se

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

sainkaDon dilkash bahaarein thiin hamaari muntazir
ham tiri khvaahish mein lekin Thokarein khaate rahe

ab itnaa aql se begaana ho gayaa huun main
gulon ke shikve sitaaron se kah rahaa huun main

is dafa to zindagi jaldi mein thi
kah do agli baar fursat mein mile