kitne chehre kitni shaklein phir bhi tanhaai vahi — Mahmood Shaam

ye aur baat ki chaahat ke zakhm gahre hain
tujhe bhulaane ki koshish to varna ki hai bahut

us ko dekhaa to ye mahsus huaa
ham bahut duur the khud se pahle

bas ek apne hi qadmon ki chaap suntaa huun
main kaun huun ki bhare shahr mein bhi tanhaa huun

aune-paune ghazlein bechin nazmon kaa bevpaar kiyaa
dekho ham ne peT ki khaatir kyaa kyaa kaarobaar kiyaa

ek jangal jis mein insaan ko darindon se hai khauf
ek jangal jis mein insaan khud se hi sahmaa huaa

chaandni shab tu jis ko DhunDne aai hai
ye kamra vo shakhs to kab kaa chhoD gayaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

hazaar rang mein mumkin hai dard kaa izhaar
tire firaaq mein marnaa hi kyaa zaruri hai

dard jaaegaa to kuchh kuchh jaaegaa par dekhnaa
chain jab jaaegaa to saaraa kaa saaraa jaaegaa

isi par khush hain ki ik dusre ke saath rahte hain
abhi tanhaai kaa matlab nahin samjhe hain ghar vaale