zamin kyuun mujh se Takraati ufuq par — Mahtab Alam

ye san kar meri nindein uD gai hain
koi meraa bhi sapnaa dekhtaa hai

aansuon ke jahaan mein rahte hain
ham isi kahkashaan mein rahte hain

zehn aise bhi na ban jaaein nisaabon vaale
guftugu mein bhi huun alfaaz kitaabon vaale

ik safar phir mari taqdir huaa jaataa hai
raasta paanv ki zanjir huaa jaataa hai

naaqido tum to mire fan ki parakh rahne do
apne sone ko main pital nahin hone dungaa

bane hain kitne chehre chaand suraj
ghazal ke istiaaraati ufuq par

shor din ko nahin sone detaa
shab ko sannaaTaa jagaa detaa hai

aadhi se ziyaada shab-e-gham kaaT chukaa huun
ab bhi agar aa jaao to ye raat baDi hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal