vafaa ibtidaa hai vafaa intihaa hai — Makhfi Lakhnavi

ishq ki allaah re fitna-kaariyaan
paak-daaman chaak-daaman ho gae

miraa aanaa jahaan mein munhasir thaa tiin baaton par
jafaa sahnaa vafaa karnaa aur us ke baad mar jaanaa

parda hai ik baqaa kaa raaz-e-fanaa na puchho
mar kar bhi saath ham se chhuTaa na zindagi kaa

yuun manzar-e-hasti pe tiri chhaa gaiin aankhein
ik kaif saa har chiiz pe barsaa gaiin aankhein

yuun be-hijaab hain ki hain jaise hijaab mein
us bazm mein kisi ko majaal-e-nazar kahaan

ishq ki fitrat ne yuun badlaa mazaaq-e-zindagi
jitne gham baDhne lage utni khushi hone lagi

hain yaadgaar-e-aalam-e-faani ye donon chiiz
us ki jafaa aur apni vafaa likh rakheinge ham

jafaa se unhon ne diyaa dil pe daagh
mukammal vafaa ki sanad ho gai

jafaa ki baatein sadaa banaanaa vafaa ki baatein kabhi na karnaa
khudaa ke ghar mein kami nahin hai kiye mein apne kami na karnaa

pareshaan hai vo jhuTaa ishq kar ke
vafaa karne ki naubat aa gai hai

ab dilon mein koi gunjaaish nahin milti 'hayaat'
bas kitaabon mein likkhaa harf-e-vafaa rah jaaegaa

bikharte jism le kar tund tufaanon mein baiThe hain
koi zarre ki surat hai koi Tiile ki surat hai