mohabbat ki bhi to ik bevafaa se — Manzar Suhai

miri nigaah ko gar teri diid ho jaae
qasam khudaa ki miri iid iid ho jaae

zaruri to nahin ye ki hilein lab
ye khaamoshi bhi to ik guftugu hai

bevafaai ki jab bhi baat chali
baa-khudaa tum bahut hi yaad aae

ik baar mein hi tu miraa qissa tamaam kar
qiston mein kar rahaa hai bhalaa qatl kyon mujhe

misl-e-mausam jo badalte to koi baat na thi
tu ne to badlaa hai girgiT ki tarah rang apnaa

laDkaa na koi phir se ho barbaad dahr mein
tujh par na jaaein beTiyaan teri khudaa kare

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

surur-e-jaan-fazaa deti hai aaghosh-e-vatan sab ko
ki jaise bhi hon bachche maan ko pyaare ek jaise hain

mohabbat phuul banne par lagi thi
palaT kar phir kali kar li hai main ne

kuchh aur vus'atein darkaar hain mohabbat ko
visaal-o-hijr pe daar-o-madaar mushkil hai

tazkira soz-e-mohabbat kaa kiyaa thaa ik baar
taa-dam-e-marg zabaan se miri chhaale na gae