kitnaa ajib-tar hai aqida janaab kaa — Mohammad Daood Mohsin

main chaahtaa huun tumhein apni zindagi ki tarah
mire vajud pe chhaa jaao chaandni ki tarah

har ek shaam sanvar jaaegi miri 'mohsin'
har ek baat tumhaari hai shaairi ki tarah

afsaana dard-o-gham kaa sunaayaa na jaaegaa
ab zakhm-e-dil kisi ko dikhaayaa na jaaegaa

itne fareb khaae hain qurbat mein yaar ki
'mohsin' fareb aur bhi khaayaa na jaaegaa

nahin hai paas kisi kaa kisi ko ai 'mohsin'
ki aazmaa ki unhein baar baar dekhaa hai

kaun apnaa hai yahaan kaun paraayaa kahiye
kaun detaa hai bhalaa dukh mein sahaaraa kahiye

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

ret par ik nishaan hai shaayad
ye hamaaraa makaan hai shaayad