haal-e-dil aghyaar se kahnaa paDaa — Muztar Khairabadi

ik sadma-e-mohabbat ik sadma-e-judaai
ginti ke do hain lekin laakhon ki jaan par hain

un kaa ik patlaa saa khanjar un kaa ik naazuk saa haath
vo to ye kahiye miri gardan khushi mein kaT gai

tum agar chaaho to miTTi se abhi paidaa hon phuul
main agar maangun to dariyaa bhi na de paani mujhe

zulf ko kyuun jakaD ke baandhaa hai
us ne bosa liyaa thaa gaal kaa kyaa

mire dil ne jhaTke uThaae hain kitne ye tum apni zulfon ke baalon se puchho
kaleje ki choTon ko main kyaa bataaun ye chhaati pe lahraane vaalon se puchho

bichhaDnaa bhi tumhaaraa jite-ji ki maut hai goyaa
use kyaa khaak lutf-e-zindagi jis se judaa tum ho

jab ki pahlu se yaar uThtaa hai
dard be-ikhtiyaar uThtaa hai

itnaa royaa huun gham-e-dost zaraa saa hans kar
muskuraate hue lamhaat se ji Dartaa hai

taa-abad khaali rahe yaa-rab dilon mein us ki jaa
jo koi laave mire ghar us ke aane ki khabar

vallaah in shahidon kaa meaar dekh kar
hai marg-e-shauq aur sivaa daar dekh kar

rahein gham ki sharar-angeziyaan yaa-rab qayaamat tak
'hayaa' gham se na milti gar kabhi fursat to achchhaa thaa

kahin khulus kahin dosti kahin pe vafaa
baDe qarine se ghar ko sajaa ke rakhte hain